E fundit!

14:21 Aktualitet

Vendimi i Kushtetueses për sekuestrimin/ Braho: Ka nevojë për rregullim ligjor procedural

Kreu i SPAK-ut, Klodjan Braho, gjatë raportimit të tij në ...

Debat mbi dyqanet e armëve në SHBA

24 Prill 2016, 21:48, Kosova & Bota CNA

Amendamenti i dytë i Kushtetutës amerikane mbron të drejtën e një personi për të mbajtur armë, por kjo e drejtë ka nxitur një debat të ashpër në të gjithë vendin, sidomos pas çdo incidenti vrasjesh masive. Një nga pikat e debatuara janë dyqanet e armëve, fusha e tyre e veprimit dhe mënyra e shitjes së armëve. Korrespondenti i Zërit të Amerikës Anush Avetisyan vizitoi një dyqan të ri armësh në periferi të Uashingtonit, hapja e të cilit ka nxitur reagime të shumta.

Para hapjes së këtij dyqani të ri armësh, në qytetin e Arlingtonit në Virxhinia, rreth katër mijë njerëz nënshkruan një peticion për të shprehur kundërshtimin e tyre. Banorët e lagjes janë të shqetësuar pasi dyqani ndodhet më pak se një kilometër nga një shkollë fillore dhe një çerdhe.

Por, zyrtarët e Arlingtonit thonë se ata nuk mund të pengojnë ligjërisht hapjen e dyqanit dhe u detyruan ta trajtonin këtë ashtu si hapjen e çdo dyqani tjetër të shitjes me pakicë.

Kundërshtarët thonë se dyqani mund të mbyllej nëse pronarja e ndërtesës, Ekaterina Varley, do të refuzonte të jepte me qera lokalin për një dyqan armësh. Por zonja Varley, mbështetëse e amendamentit të dytë, thotë se ajo mund t?ia japë me qira kujt të dojë hapësirat e ndërtesës.

“Ky është qiramarrësi im dhe është një biznes i ligjshëm. Nuk e kuptoj lidhjen mes fëmijëve tre-vjeçarë në çerdhe dhe një dyqani armësh”.

Mbrojtësit e dyqanit thonë se armët janë për vetëmbrojtje dhe për gjueti.

“Këto janë armë gjysmë-automatike. Ka rregulla të forta kundër armëve automatike dhe ato nuk shiten në dyqane të këtij lloji. Këto janë ndoshta shumë më pak të fuqishme se pushkët e gjuetisë,” thotë Stephen Gutowski, armëmbajtës.

Por, kundërshtarët e armëmbajtjes theksojnë se armë të tilla janë përdorur në shumë incidente vrasjesh masive, duke përfshirë vrasjen e nxënësve në shkollën fillore Sandy Hook në Connecticut.

“Ashtu siç i kontrollojmë sytë tanë çdo vit ne duhet të kontrollojmë edhe kokat tona për të parë nëse jemi të sigurt. Ka shumë njerëz të mirë të cilët kanë armë dhe nuk humbin kontrollin, por mes tyre ka edhe njerëz të çekuilibruar,”thotë një protestuese.

Ky punonjës dyqani thotë se një njeri nuk mundet thjesht të hyjë në dyqan dhe të blejë armë, atyre u bëhet kontrolli i biografisë para blerjes së një arme.

“Blerësi duhet të ketë disa forma identiteti, formularin federal 4473 dhe një formular shtetëror. Ne bëjmë kontrollin e dokumentit të identifikimit këtu dhe policia e shtetit përmes sistemit të saj kontrollon të dhënat e blerësit. Nganjëherë ka vonesa. Kërkësa për të blerë armë nuk miratohet gjithmonë për një çast,” thotë John, punonjës i dyqanit.

Por Mark Levin, anëtar i Dhomës së Delegatëve në Virxhinia, thotë se kontrollet e biografisë nuk janë gjithmonë të efektshme.

“Personat me biografi të miratuar mund të rishesin armët pa kontroll të biografisë. Grupet kriminale në Uashignton mund të vijnë në Arlington, ata mund të takohen në internet dhe mund të shesin armën në një vend parkim”.

Pronarët e dyqaneve shpresojnë që biznesi i tyre do të ketë sukses pavarësisht protestave.

Në ditën e hapjes, dhjetëra mbështetës të armëmbajtjes erdhën për të përkrahur dyqanin dhe të drejtën e hapjes së tij në këtë lagje periferike./VOA