web counter
LEXO PA REKLAMA!

SHKARKO APP

App Store
Google Play

Pse hesht Meta për propozimin e Berishës?

23 Prill 2016, 16:12, Aktualitet CNA

Propozimi i ish-Kryeministrit Sali Berisha për pajisjen e qytetarëve me armë solli një sërë reagimesh, pro dhe kundër miratimit të një ligji të tillë. Debati i ndezur jo vetëm në Kuvend, por edhe në studio televizive apo rrjete sociale nxorri në pah një element interesant: heshtjen e kreut të LSI-së, Ilir Meta.

Nëse i referohemi deklaratave dhe prononcimeve publike, vëmë re se asnjë prej eksponentëve apo përfaqësuesve të Lëvizjes Socialiste për Integrim nuk kanë komentuar lidhur me propozimin e Berishës.

Heshtja e Metës lë vend për aludime lidhur me skenarët e mundshëm për të ardhmen e politikës shqiptare.

Ndërkohë distancimi i Metës është vënë re edhe ditën e djeshme, në mbledhjen e Byrosë së Kuvendit, ku u vendos përjashtimi me dhjetë ditë i ish-shefit të qeverisë, Sali Berisha nga punimet e Parlamentit. Mediat raportuan se Kryeparlamentari Meta ka refuzuar të votojë për përjashtimin ose jo të Berishës. ?Unë nuk po marr pjesë në votim? mësohet të ketë thënë Meta në mbledhjen e Byrosë.

Heshtja e Kryetarit të partisë aleatë më të madhe të PS-së lë vend për interpretime të ndryshme edhe për një arsye tjetër. Në një kohë kur Presidenti i Republikës, Bujar Nishani doli kundër propozimit të Berishës pa kaluar 24 orë nga thirrja e ish-Kryeministrit Berisha në parlament, heshtja e Metës mund të jetë një strategji e zgjedhur me kujdes.

Nuk dihet nëse taktika e zgjedhur nga Meta është në kuadrin e ?rilindjes? së një dashurie mes LSI-së dhe PD-së, apo distancimi i tij dhe LSI-së është thjesht dhe vetëm në kornizat e propozimit të një ligji paksa delikat./citynews





Lajmet e fundit nga