Patozi ironizon mazhorancën për komisionin hetimor të CEZ-it

14 Prill 2016, 17:45, Aktualitet CNA

Deputeti i Partisë Demokratike, Astrit Patozi, ironizoi sot në parlament mazhorancën pasi kjo e fundit ra më në fund dakord për ngritjen e komisionit hetimor për hetimin e CEZ, kërkesë forcës së tij politike. Partia Socialiste, e cila e kishte refuzuar fillimisht kërkesën e demokratëve, pranoi sot që ta miratojë atë, me kushtin që paralelisht me të të ngrihet edhe një komision tjetër hetimor, i cili do të hetojë CEZ-in, gjatë periudhës që ka qeverisur Partia Demokratike.

Në kohën që ngritja e dy komisioneve po votohej në seancë, Patozi tha se ai propozonte edhe ngritjen e një komisioni tjetër hetimor që të drejtohej nga LSI, në mënyrë që i gjithë parlamenti të përfaqësohej për këtë cështje, por dhe qytetarët të kishin një transparencë të plotë.

“Në këto 25 vjet parlament pluralist, ne nuk kemi ndonjë arsye për t’u krenuar për sa i përket komisioneve parlamentare”,- tha Patozi. “Sepse të gjithë në këtë sallë, por sidomos qytetarët që na ndjekin, bien dakord se shumica e tyre kanë dështuar. Kjo nuk e përjashton faktin që disa prej tyre ia kanë vlejtur, ndonëse ato numërohen me gishta. Por pavarësisht kësaj historie të palavdishme, ne nuk kishim arritur gjithsesi në këtë pikë, kur për një cështje të kishim dy komisione, si tani. Një nga Partia Demokratike, që kërkon hetimin e kohës kur qeveris Edi Rama, dhe një tjetër nga Partia Socialiste, që kërkon të hetojë kohën kur ne ishim në pushtet.”

“Dhe meqë kemi mbërritur në këtë pikë, -vijoi Patozi- unë propozoj që të ngrejmë edhe një komision të tretë hetimor, që të merret në tërësi me cështjen, prej lindjes e deri në vdekje të CEZ-it, i cili të drejtohet nga LSI. Në këtë mënyrë, vijoi ai, edhe parlamenti do të ishte më i përfaqësuar në këtë cështje, por edhe qytetarët do të gjenin më shumë transparencë për CEZ-in.”

Ironia e tij, që i adresohej kryesisht Partisë Socialiste, cuditërisht shkaktoi reagimin e kryetarit të Kuvendit, Ilir Meta, i cili nuk dihet se për cfarë arsye tha në replikë se në këtë hetim mund të përfshihet edhe Bashkia e Vorës. Sic dihet, kjo e fundit u bë në zgjedhjet e fundit një arenë e ashpër e përplasjes mes Partisë Demokratike dhe Lëvizjes Socialiste për Integrim, dhe ku kandidati demokrat rezultoi fitues. Patozi, ishte drejtuesi i fushatës së Partisë Demokratike në këtë bashki, i cili gjatë fushatës u përfshi shpeh herë në polemika të ashpra me kryetarin e Kuvendit, Ilir Meta.