web counter
LEXO PA REKLAMA!

SHKARKO APP

App Store
Google Play

Greqi/ Sekuestrohen 1.4 ton hashash, në kërkim dy shqiptarë

14 Prill 2016, 17:06, Aktualitet CNA

Organet greke kanë zbuluar pjesën e tretë të një ngarkese të madhe me lëndë narkotike, në zonën detare midis ishullit të Otonit dhe Korfuzit.

Forcat e Marinës detare kanë gjetur në 24 orët e fundit, midis shkëmbinjve, 7 thasë, 8 valixhe dhe 31 pako të mëdha me rreth 881 kg hashash gjithsej, të fshehura me kujdes.

Më pas, në këtë zonë kanë mbërritur forcat e Antidrogës, që kanë marrë në dorëzim sasinë e lëndës narkotike, për ta çuar atë në ambientet e posaçme të Portit të Korfuzit.

Të premten e kaluar, në të njëjtën zonë të bregdetit të ishullit Otoni, por edhe në ujë u zbuluan 42 pako të izoluara shumë mirë me rreth 551 kg hashash, ndërsa një ditë më parë ishin gjetur përreth kësaj zone 17 pako të tjera, me 78 kg hashash.

Forcat greke të Marinës detare kanë bërë të ditur se janë lajmëruar një javë më parë, se një motoskaf me motor të fuqishëm u përpoq të shkarkonte në bregdetin italian një sasi të madhe lëndësh narkotike, por pasi është zbuluar nga ?Guardia di Finanza? është drejtuar në zonën detare midis Shqipërisë dhe Greqisë, ku mesa duket ka fshehur më shumë se 1.4 tonë hashash në vende të ndryshme.

Gjithashtu, sipas informacioneve të autoriteteve policore të Korfuzit, dy personat që drejtonin mjetin lundrues janë shtetas shqiptarë, të cilët janë shpallur në kërkim prej Antidrogës greke./TCH





Lajmet e fundit nga