E fundit!

09:19 Denoncim

Financimi i kullës së Ervin Matës/ Plug: Mbi 28 milionë euro autofaturime për kompanitë e lidhura me Vilma Nushin

Pas denoncimit të parë, emisioni Plug ka vijuar sërish inv...

Blushi nuk duhet të bëjë hapa pas, për referendumin!/ Nga Mero Baze

11 Prill 2016, 18:00, Aktualitet CNA

Janë dy gjëra që nuk ja vlen të debatohen më për referendumin në Partinë Socialiste. E para, është rezultati i thellë i arritur në favor të Ramës dhe e dyta, është serioziteti i votimit. E vetmja gjë që vlente të debatohej, ishte nëse duhej apo jo referendum, dhe jo si u bë dhe sa doli referendumi. Në këtë pikë, Blushi ishte në të drejtën e tij kur fliste për padobinë e referendumit, dhe përdorimin e tij si një mekanizëm fallco për të legjitimuar shkeljet e statutit dhe për t?i dhënë fuqi prapavepruse, statutit të ri të PS.

Me atë qëndrim, Blushi ishte qartazi kundër referendumit, nuk e njohu atë, nuk mori pjesë në atë dhe nuk delegoi askënd ta monitoronte. Dhe mendoj që ka bërë mirë.

Tani debatet e së hënës janë një kthim mbrapa, pasi duket sikur Blushi ka qenë pro referendumit dhe e shqetëson rezultati i thellë dhe rregulli që ka karakterizuar votimin.

Ky tani është debat bosh dhe pa bukë, që më shumë dëmton qëndrimin parimor të Blushit, se sa dëmton imazhin e referendumit. Biles ky është i vetmi debat që e legjitimon referendumin.

Kam parë shumë njerëz, sidomos ish- socialistë të mërzitur, që bëjnë humor dhe janë gdhirë papritur antikomunistë, duke krahasuar referendumin me votimet në kohë të komunizmit. Edhe pse nuk u takon të tallen, se janë të gjithë ish- komunistë, mua nuk më impresionon ajo shifër. Nuk do më impresiononte dhe po të dilte 100 për qind, pasi referendumi në vetvete nuk ishte një garë mes dy alternativash, por një konfirmim lidershipi, si zgjedhjet në komunizëm. Askush në Partinë Socialiste nuk e hedh poshtë lidershipin e Edi Ramës, nëse ai nuk ka alternativë tjetër dhe nuk ka asgjë për t?u çuditur.

Edhe ideja tjetër, që në referendum mund të ketë pasur parregullsi, kur e lidh me arsyet përse duhej referendum, duken qesharake.

Ky referendum ka prodhuar atë rezultat që ka prodhuar dhe me ato rregulla me të cilat qeveriset Partia Socialiste, dhe debati rreth këtyre çështjeve është debat bosh, pa asnjë vlerë.

Debati real ishte nëse duhej apo jo referendumi dhe ata që ishin kundër referendumit, dhe që e bojktuan atë, nuk duhet të kthehen pas në kohë të pranojnë referendumin dhe të diskutojnë për cilësinë e tij.

Mos kini dyshim, se socialistët nuk do të votonin kundër Edi Ramës, edhe sikur referendumin ta drejtonte shtabi që zgjodhi Bashën dhe i vodhi votat Olldashit. Maksimumi do dilte sa doli Basha me Olldashin. As nuk ka dyshim nga ana tjetër, që në Partinë Socialiste ka më shumë rregull se në partitë e tjera, sa i përket votimeve, edhe pse referendumi ishte një sforco kot, pa asnjë pikë llogjike.

Ndaj është mirë që Blushi të mos bëjë hapa prapa në raport me referendumin. Ai duhet t?i përmbahet idesë së tij kundër referendumit dhe të vrasë mendjen të gjejë kauza të tjera për betejë poltike, dhe jo të merret me ?cic mice? administrative të referendumit, pasi ai është në parim kundër tij. Frika ime është se rezultati do ishin më i thellë sikur të mos kishte referendum, por garë mes Ramës e Blushit, dhe ai do ishte një lajm i keq për demokracinë dhe një lajm i mirë për Ramën. Por falë bezdisë që ka Rama për të zbatuar statutin e partisë së tij, tani kemi një debat bosh për referendumin dhe jo për votat pro dhe kundër tij. Bëhet fjalë për një gjimnastikë zgjedhore brenda PS, që nuk vlen të lexohet, as si rezultat dhe as si cilësi, por vetëm si ngjarje. Ata që nuk donin të ndodhte kjo ngjarje, dhe që kishin të drejtë, tani të mos bëjnë hapa mbrapa e të diskutojnë për cilësinë e tij.