E fundit!

17:50 Kronika

Morën ryshfet nga shoferi/ AMP arreston në flagrancë 2 punonjës policie

Agjencia e Mbikëqyrjes Policore ka arrestuar në flagrancë ...

Nga Kastriot Myftaraj/ Prokuroria të kuptojë se koncesioni i markimit të karburanteve është i pavlefshëm që nga shtatori 2015

5 Prill 2016, 19:42, Aktualitet CNA

Kur kompanitë fiktive të regjistruara në off shore, qoftë në një shtet amerikanolatin që funksionon si i tillë, ishull diku në oqean, ose kanton në Zvicër, marrin koncesione si në rastin e markimit të karburanteve, ato janë të detyruara të krijojnë një partneritet në letër me një kompani serioze që e ushtron vërtet këtë veprimtari. Kjo kompani e dytë, në këtë rast shet vetëm emrin, nëpërmjet krijimit të një kompanije bijë të përbashkët me kompaninë tjetër fiktive dhe për këtë shërbim merr një shpërblim financiar në trajtë komisioni në llogaritë bankare off shore.
Në rastin e koncesionit të markimit të karburanteve, Qeveria e Shqipërisë po ia jepte atë kompanisë Petroleum Consulting Partners A.G., një kompani fiktive e regjistruar në Zvicër, një vit para marrjes së koncesionit. Por meqënëse kjo kompani nuk kishte asnjë përvojë, as një ekspertizë, asnjë kapacitet teknologjik, asnjë lloj logjistike për të kryer markimin e karburanteve, prandaj krijoi një partneritet me kompaninë kanadeze Global Fluids International S.A, e cila ishte e specializuar për të kryer shërbime të tilla si ai i këtij koncesioni.
Ky partneritet u bë duke u krijuar një kompani bijë e përbashkët e dy kompanive të mësipërme, me emrin Global Fluids International Albania sh.p.k. Në sajë të kësaj kompanie, ku Petroleum Consulting Partners A.G zotëronte 25%, kjo e fundit mund të mëtonte se përmbushte kriteret për të kryer detyrimet e kontratës koncesionare. Por në shtator 2015, meqënëse Global Fluids International S.A kishte dalë në shitje në Kanada, likuidoi kompaninë bijë në Shqipëri, duke mbajtur vetëm 0.07% të saj. Kuptohet që edhe këtë përqindje kaq të vogël e mbajti vetëm që Petroleum Consulting Partners A.G të mund të mos humbte koncesionin, për shkak se nuk zotëronte asnjë kapacitet teknik, logjistikë dhe ekspertizë për të kryer detyrimet që i vinë nga koncesione.
E tillë është llogaria që kanë bërë këto kompani të botës së off shoreve. Por një kompani fiktive nuk mund të mëtojë të vazhdojë të mbajë një koncesion duke pasur një partneritet me një kompani që ka vetëm 0.07% në këtë partneritet. Kjo do të thotë se në rastin më të mirë, në koncesionin e karburanteve, në letër ka 0.07% veprimtari të specializuar teknike për kryerjen e detyrimeve nga koncesionari. Në realitet nuk ekziston as kjo dhe kjo gjë është lehtësisht e vërtetueshme nëpërmjet kqyrjes së kryerjes së procesit të markimit të karburanteve që bëhet në mënyrën më primitive të imagjinueshme.
Prokuroria Shqiptare nuk mund të mbyllë sytë para këtyre fakteve. Tashmë koncesioni është deformuar në atë mënyrë që në fjalorin juridik quhet ?në mashtrim të ligjit?. Prokuroria duhet të shpallë urdhër arresti për koncesionarët për veprën penale të mashtrimit. Qeveria Shqiptare duhet ta kishte ndërprerë koncesionin që në shtatorin e kaluar kur u tërhoq edhe në letër kompania e specializuar kanadeze. Qeveria e sotme është përgjegjëse që vazhdon të jetë në fuqi një Vendim i Këshillit të Ministrave, i cili as nuk duhet të ishte miratuar. Nëse Qeveria ?Berisha? ishte përgjegjëse për miratimin e VKM, Qeveria ?Rama? është përgjegjëse që ajo vazhdon të jetë në fuqi. LSI është përgjegjëse se ka qenë në të dy qeveritë.
Qeveria Shqiptare duhet ta ndërpresë koncesionin dhe Prokuroria ta penalizojë atë, pa u trembur për pasojat që mund të ketë Shqipëria në Gjykatën e Arbitrazhit nëse ankohet koncesionari, ose më saktë çfarë ka mbetur nga koncesionari. Sepse pas stuhisë globale që krijoi publikimi i Dokumenteve të Panamasë, do të ketë një stuhi gjyqësore në botë kundër kompanive të off shoreve dhe gjykata e arbitrazhit do të përmbytet nga ankesat e tyre, e thjesht nuk mund të bëjë asgjë për mbrojtjen e tyre në rrethanat e kësaj klime globale kundër këtyre lloj kompanive. Në rastin e koncesionarit shqiptar të markimit të karburanteve, ai ka tjetërsuar edhe kontratën fillestare në atë masë sa e ka bërë të pavlefshme.