Meta shpreh ngushëllimet për ndarjen nga jeta të Perlat Ramçes

23 Mars 2016, 20:00, Aktualitet CNA

Kryetari i Kuvendit, Ilir Meta ka shprehur ngushëllimet për ndarjen nga jeta të ish-kryebashkiakut të Malësisë së Madhe, Perla Ramçes. Përmes një mesazhi drejtuar familjes Ramçe, Meta tha se Perlati ishte një mik i mrekullueshëm që fatkeqësisht nuk e fitoi dot betejën me sëmundjen e rëndë që e mori në mënyrë të papritur.

Kryetari i Kuvendit vlerësoi Perlat Ramçen si një trashëgimtar i vlerave më të mira të një prej familjeve më të nderuara të Malësisë së Madhe. ?Me hidhërim të thellë mësova lajmin për ndarjen nga jeta dhe ikjen e beftë të njeriut të mirë Perlat Ramçe. Perlati ishte një mik i mrekullueshëm që fatkeqësisht nuk e fitoi dot betejën e fundme, betejën me armikun e lig, sëmundjen e rëndë që e mori në mënyrë të papritur. I angazhuar që herët në politikë, kryetar i bashkisë së Koplikut që në vitet e para të pluralizmit, bir dhe trashëgimtar i vlerave më të mira të një prej familjeve më të mëdha e më të nderuara të Malësisë së Madhe, Perlati u bë shpejt një pikë e rëndësishme referimi për politikën lokale në përgjithësi dhe për të majtën shqiptare në veçanti, për të gjithë zonën?, – shkruan z. Ilir Meta në mesazhin e ngushëllimit.

Gjithashtu, Kryetari i Kuvendit shprehet se Perlat Ramçe ishte një nga drejtuesit e aftë që mbajti dhe ushtroi disa detyra të rëndësishme në vitet e fundit në Malësi të Madhe dhe se ishte një kontribuues i çmuar për njerëzit.

?Perlati ishte gjithashtu një nga drejtuesit e aftë që mbajti dhe ushtroi disa detyra të rëndësishme në vitet e fundit në Malësi të Madhe. Mikpritës i rrallë dhe komunikues i aftë, natyrë e fortë njerëzore dhe një kontribuues i çmuar për njerëzit, Perlati la pas një nga ato boshllëqe që është vështirë të mbushen. Perlati la në pikëllim gruan, vajzën dhe djalin e tij, shokët dhe miqtë e tij të shumtë, por Ai la pas emrin e mirë dhe një kujtim të paharruar për gjithkënd që pati fatin ta njohë. Unë humba një mik, vlera e të cilit bëhet edhe më e madhe dhe pesha humbjes së tij, bëhet edhe më e rëndë, nga ikja e papritur. Ngushëllimet e mia më të sinqerta!?, – shkruhet ndër të tjera në mesazhin që Kryetari i Kuvendit i drejton familjes Ramçe.