Frika e Edi Ramës, nesër në Kongres/ Nga Dritan Hila

18 Mars 2016, 20:56, Aktualitet CNA

Një ditë përpara Kongresit të socialistëve, Edi Rama ka nxjerrë lajmin e vizitës që do të bëjë në Uashington muajin që vjen. Është një lajm, i hedhur jo pa qëllim përpara Kongresit i cili normalisht nuk paraqet asnjë problem për atë vetë.
Me zgjedhje të bëra nga emisarët e tij të cilët shquhen për besnikëri të verbër, me delegatë që kanë kaluar në filtrin e besnikërisë, me qënien parti në pushtet, me drejtimin prej 11 vjetësh që i ka lejuar mundësinë e përzgjedhjes së të vetëve, Edi Rama e ka të sigurtë që do të bëjë gjithçka do të ketë dëshirë. Me siguri kongresi do miratojë statutin e modelit të lajmëruar nga Taulant Balla dhe të kodifikuar nga Fatmir Xhafa. Po aq e sigurtë është që në Kongres nuk do të reflektohet pakënaqësia që mund të ketë një pjesë e bazës dhe e popullsisë për gjendjen ekonomike, pasi të rinjtë janë besnikë të tij, ndërsa të vjetrit janë të çertifikuar që janë besnikë të çdo kryetari të PS.
E vetmja e re, pritet të jetë kërkesa e Ben Blushit për zgjedhjen e kryetarit. Por nga e thëna në të bërë, gjithçka duhet rishtas të kalojë në filtrat e Ramës, duke filluar që nga mundësia për të folur, pranimi i kërkesës për zgjedhje, dhe procedurat. Dhe rezultati lë pak për të dyshuar, se do të jetë në favor të Blushit. Ndërkohë edhe rradhët e dhjetë ndjekësve të Blushit, nuk dihet sa janë kompakte, pasi Rama nuk ka munguar të miklojë disa prej tyre.
Është i panjohur fatin i mëpasëm i Blushit në PS. Nëse e përjashton nga çdo forum, i jep kartën e shizmës. Nëse e le në të njejtin pozicion partiak ku është, i heq kauzën e statutit. Pasi aksioni i Blushit ka difektin që kauzën e tij e ngriti mbi një nen të statutit që nuk ishte zbatuar dhe jo nga shmangia që i ka bërë Rama qeverisjes nga programi i 2013-ës dhe parimeve të majta.
E megjithatë Rama ka frikë nga Blushi. Ka, sepse e ndjen që zotëron numrat, por jo zemrat e socialistëve. Dhe kjo është pika e fortë e Blushit që është në familjen e vet, famije e cila thellë thellë, nuk ia fal kryetarit aktual, as sjelljen e tij në të shkuarën e largët, e as në të tashmën e afërt. Ndaj Rama për herë të parë pas 11 vjetësh në PS, i mbyll fjalimet me thirrjen ?Rroftë Partia Socialiste?. Dhe hedh lajmin që do të vizitojë Shtëpinë e Bardhë./dritare.net