web counter
LEXO PA REKLAMA!

SHKARKO APP

App Store
Google Play

E fundit!

x

Nga Edison YPI/Fal Internetit

4 Mars 2016, 08:44, Opinione CNA

Fal Internetit, shqiptari sa më i ndershëm të jetë, aq më tepër sulmohet, sa më tepër të punojë aq më tepër përbuzet, sa më tepër shkollë të bëjë, aq më budalla katandiset. Sa më tepër të dijë, aq më pak vlen.
Fal Internetit, dijetarët, shtetarët, krerët, nuk i kemi aspak më ndryshe por saktësisht ashtu si i preferojmë.
Fal Internetit, “Shqiptari i Vitit” është Kaçarrum Kaçamaku nga Takapi Komuna e Sumës, ndërsa “Shqiptari i Shekullit” është dhe në jetë të jetëve do jetë Loqemadh Katunari nga Taplasi, Komuna e Stërlëngut, Prefektura e Hiçit.
Fal Internetit, ajo që do duhej të ishte shtylla e shoqërisë, mikroborgjezia jonë, më së fundi ekziston, dhe me jetë e paçim, por është më e fëlliqura në fytyrë të dheut; Ca parazitë e ca hajdutë, ca bajga që hiqen për aristokratë e ca pëgërje që mbahen për elitë.
Fal internetit, shqiptar i shquar mund të jetë çdo hajdut që ngre një flamur dhe çdo budalla që bën hatanë me 1 rrjesht e gjysëm në fejsbuk.
Fal Internetit, çdo vrasës është më i rëndësishëm dhe i lavdishëm se një krahinë e tërë që nuk prodhon lajme për kronikat e krimit por vetëm grurë, misër, mish, qumësht.
Fal Internetit janë shtuar frikshëm ca budallaqe në kërkim të burrit që fotografojnë surratin e vet nga dhjetra kënde, shkruajnë vargje për të vjellë, sajojnë maksima me t’i sjell zorrët në fyt, nxjerrin piktura me sorkadhe të pëlotura, përrua që rrjedh, liqen, pulëbardha, lejlekë, hënë e zbehtë në horizont.
Fal Internetit u muar vesh se skemat mashtruese financiare shqiptarët i paskan pasur hak si një pësim që sjell një mësim me vlera edukative dhe efekt kurativ të pazëvendësueshëm nga asnjë teori dhe praktikë ekonomike.
Fal Internetit u provua se kapaciteti cerebral i shitësit të bulmetit, kasapit, marangozit, katundares që sjell qumështin, është pakrahasimisht më i madh se i çdo personazhi publik që flet e llomotit pafund pa thënë asgjë.
Fal Internetit nuk ka asnjë dyshim se shqiptarët Lirinë nuk e pranojnë si zgjerim por si ngushtim. Pra tmerri i diktaturës ende nuk u ka dalë, janë praktikisht në burg, mungojnë vetëm telat me gjëmba.
Fal Internetit u bë e qartë, por shqiptarët ende nuk po e kuptojnë, se Liria, jo vetëm fitohet, por edhe shpërdorohet, dhe pasi shpërdorohet edhe zhduket.





Lajmet e fundit nga