Drejtori i Policisë, Çako vizitë zyrtare në selinë e Frontex në Varshavë

2 Mars 2016, 19:43, Aktualitet CNA

Drejtori i Policisë së Shtetit, Haki Çako, ka zhvilluar ditën e sotme, pranë ambienteve të selisë qendrore të Frontex-it në Varshavë, një takim me Drejtorin Ekzekutiv të Frontex, z. Fabrice Leggeri. Qëllimi i takimit ishte ?Rishikimi i marrëveshjes së bashkëpunimit operacional ndërmjet FRONTEX dhe Policisë së Shtetit?.

Të pranishëm në këtë takim ishin edhe nëndrejtori i Frontex-it, z. Berndt Korner, drejtuesi i Sallës operacionale të Frontex-it, Shefi i sektorit të analizës së rrezikut si dhe zyrtarë të tjerë të lartë të këtij institucioni. Drejtori i Policisë së Shtetit në këtë takim shoqërohej nga Drejtori i Përgjithshëm për Kufirin dhe Migracionin, Drejtues i Lartë Genc Merepeza.

Gjatë këtij takimi, Drejtorit të Policisë së Shtetit iu bë një prezantim i detajuar i programeve dhe iniciativave të ndërmarra në kuadrin e Frontex-it. Më pas, Drejtori i qendrës operacionale të Frontex-it z. Klaus Rosler i paraqiti z. Çako aktivitetet operacionale të Frontex-it, për vitin 2016.

Gjithashtu u diskutua mbi vështirësitë që paraqet përballimi i flukseve të reja migratore nga vendet e prekura nga lufta në drejtim të vendeve të rajonit tonë dhe më pas të atyre të Evropës Veriore dhe Perëndimore. Të pranishmit në këtë takim diskutuan gjithashtu mbi mundësimin e rritjes së bashkëpunimit midis Frontex-it dhe vendeve të tjera të cilat nuk janë anëtare të BE-së.

cako Drejtuesit e Frontex-it falënderuan Drejtorin e Policisë së Shtetit për impenjimin e tij personal dhe atë të institucionit që ai përfaqëson në përballimin dhe luftën e përditshme kundër emigracionit të paligjshëm. ?Jo vetëm angazhimi i drejtorisë së Kufirit dhe Migracionit, por në tërësi i të gjithë Policisë së Shtetit, do të jetë maksimal, me qëllim ruajtjen dhe përmirësimin e standardeve që kemi arritur deri më sot, falë bashkëpunimit me Frontex-in dhe misionet e tjera ndërkombëtare?, u shpreh Çako në fjalën e tij.

Gjatë takimit, Drejtori i Policisë së Shtetit Haki Çako, në emër të Ministrit të Punëve të Brendshme, z. Saimir Tahiri, i dha nëndrejtorit të Frontex-it, z. Berndt Korneri, ?Medaljen e Nderit? për kontributin e dhënë me punën e tij, për rritjen dhe përmirësimin e standardeve të Policisë së Shtetit, dhe në veçanti të Policisë Kufitare dhe Migracionit në procesin e Menaxhimit të Integruar të Kufirit.