web counter
LEXO PA REKLAMA!

SHKARKO APP

App Store
Google Play

E fundit!

x

Pr.ligji për të drejtën e autorit/ Deputetja e LSI-së debat me Ministren Kumbaro

2 Shkurt 2016, 08:24, Aktualitet CNA

Deputetja e Lëvizjes Socialiste për Integrim, Silva Caka, ka kritikuar dje ministren e Kulturës, Mirela Kumbaro për projektligjin e ri për të drejtat e autorit. Deputetja e LSI ishte relatorja e projektligjit në Komisionin e Ligjeve dhe ajo preferoi të rendiste të gjithë rezervat e grupeve të interesit sa i përket projektligjit për të drejtat e autorit. ?Grupet e interesit siç është Digitalb, TelekomAlbania, Televizioni Klan, Dhoma Amerikane e Tregtisë kanë ngritur një shqetësim në opinionet e tyre që i kanë dërguar Komisionit të Ligjeve në lidhje me mungesën e konsultimit gjatë fazës së hartimit të projektligjit për mosmarrje në konsideratë të sugjerimeve të tyre.

Dhe do të kërkoja nga zonja ministre të sqaronte konkretisht në çfarë raporti janë marrë në konsideratë propozimet dhe sugjerimet e tyre. Dhe sigurisht pjesa e mos konsultimit publik të ligjit nga ana e ministrisë?, tha deputetja e LSI në Komisionin e Ligjeve, ndërsa prezantoi disa pika të ligjit. Duke u ndalur në mënyrë konkrete, Caka tha se grupet e interesit kanë shprehur rezerva sa i përket agjencive të Administrimit Kolektiv që merr shumë kompetenca. Sipas Cakës, neni 131 u mohon autorëve të drejtën ekskluzive të tyre mbi veprën. ?Grupet e interesit kanë ngritur shqetësimin e tyre lidhur me parashikimin ligjor të Agjencive të Administrimit Kolektiv, konkretisht për nenin 131 të projektligjit, duke theksuar se administrimi kolektiv i cenon dhe mohon autorëve të drejtën të administrojnë vetë të drejtën e autorit dhe të drejtat e lidhura me të?, tha Caka, duke shtuar se Agjencia e Administrimit Kolektiv nuk mund të administrojë të drejtën e autorit pa patur autorizimin apo mandat.

?Kjo dispozitë sipas tyre bie ndesh me dispozitat e Kodit Civil në lidhje me përfaqësimin, dhe për aq kohë sa të drejtat e autorit dhe të drejtat e lidhura me to, qoftë me karakterin pasuror apo moral, janë të drejta që i përkasin ekskluzivisht autorit, ai duhet të jetë i lirë për të disponuar këto të drejta, sipas vullnetit të tij, dhe nuk mundet që një Agjenci e Administrimit Kolektiv ta administrojë atë apriori, pa patur një autorizim apo mandat, apo një kontratë me autorin që u lejon atyre administrimin e të drejtave të tyre?, shpreh deputetja e LSI. Caka renditi edhe disa rezerva për projektligjin./SOT





Lajmet e fundit nga