Qeveria 1.1 mld lekë detyrime në 8 mujorin e 2015/ Në listë, pjesa dërrmuese e ministrive

14 Janar 2016, 20:43, Aktualitet CNA

Llogariten në mbi 1.1 miliardë lekë detyrimet që qeveria ka krijuar rishtazi gjatë 8 mujorit të vitit 2015. Kjo me gjithë presionin e FMN-së dhe Bankës Botërore, si dhe angazhimit publik të kryeministrit për të mos krijuar borxhe të reja. Të dhënat e Ministrisë së Financave tregojnë për detyrime të krijuara nga pjesa dërrmuese e ministrive, kryesisht si rezultat i vendimeve gjyqësore.

Qeveria ka krijuar borxhe të reja rishtazi të bizneset dhe qytetarët, pavarësisht angazhimit të saj publik për të mos ndjekur modelin e qeverisë së mëparshme, por edhe qendrimit kundër të FMN-së dhe Bankës Botërore. Nga të dhënat e ministrisë së Financave rezulton se gjatë periudhës janar-gusht të vitit që lamë pas, qeveria krijoi mbi 1.1 miliardë lekë borxhe.

Sipas të dhënave, Ministria e Transportit dhe Infrastruktures ka krijuar detyrime në vlerën rreth 622 milionë lekë, nga Autoriteti Rrugor Shqiptar dhe Drejtoria e Përgjithshme e Ujësjellës Kanalizime. Ministria e Arsimit ka krijuar detyrime në vlerën 36 milion lekëve; Ministria e Drejtesisë deklaron lindjen e detyrimeve në vlerën totale 42.6 milion lekë, Ministria e Shëndetësisë deklaron lindjen e detyrimeve në vlerën 11.5 milion lekë, Ministria e Punëve të Brendshme ka krijuar një detyrim prej 10.5 milion lekë, Ministria e Zhvillimit Ekonomik raporton një vlerë prej 63 milionë lekësh dhe ministria e Mirëqënies Sociale ka krijuar nje detyrim prej 6.2 milion lekësh.

Ministria e Financave ka përfshirë në monitorim edhe disa ministri të tjera për borxhet që kanë krijuar, si ministrria e Zhvillimit Urban, që raporton një detyrim prej 3.3 milionë lekësh, të lindura si detyrime nga vendimet gjyqësore të formës së prerë të krijuara në gjatë vitit 2015.

DETYRIMET E KRIJUARA RISHTAZI

Ministria e Transportit 622 milion lekë

Ministria e Arsimit 36 milion lekë

Ministria e Drejtesisë 42.6 milion lekë

Ministria e Shëndetësisë 11.5 milion lekë

Ministria e Punëve të Brendshme 10.5 milion lekë

Ministria e Zhvillimit Ekonomik 63 milionë lekë

Ministria e Mirëqënies Sociale 6.2 milion lekë

Ora News