Progres Raporti/ Tabaku: Kemi ngelur në klasë, këmbanë alarmi për qeverinë

10 Nëntor 2015, 18:25, Aktualitet CNA

Deputetja demokrate, Jorida Tabaku shprehet se progres raporti nga Bashkimi Evropian për Shqipërinë i publikuar ditën e sotme, duhet të shërbejë si një kambanë shumë e fortë alarmi për qeverinë, e cila sipas saj e ka mendjen se si të ndryshojë formën ndonëse mbetet e kalbur në përmbajtje.

Përmes një postimi në rrjetin social Facebook, Tabaku analizon faktorët që çuan në mos hapjen e negociatave për integrimin në Bashkimin Evropian.

Qëndrimi i plotë i deputetes së PD-së, Jorida Tabaku:

Sot mbas pothuajse një muaj vonesë u publikua ?Progres raporti për Shqipërinë?. Asgjë e re nga fronti i Perëndimit.

Shqipëria nuk ka bërë progres të dukshëm për hapjen e negociatave:
– sistemi gjygjësor mbetet problematik dhe me korrupsion të lartë
– lufta ndaj krimit të organizuar dhe korrupsionit duhet të intensifikohet. Konfiskimi asesteve në vlerë të vogël, numri i të arrestuarve është i vogel krahasuar me tregun e drogës dhe luftë e dobet ndaj korrupsionit megjithëse ekziston një strategji në letër.
– pika të dobëta mbeten shteti i të drejtës, kompensimi dhe vlerësimi i pronës. Pa harruar dhe thelbin e demokracisë, zgjedhjet të cilat janë prekur nga sëmundja e paanshmërisë së organeve që administrojnë procesin zgjedhor.
-Nevojë për trajtimin e çështjes së azilkërkuesve. Asnjë monitorim nga qeveria pas rritjes së fluksit madje shtimin e aksioneve që përkeqësojnë gjendjen ekonomike duke i shtyrë shqiptarët të largohen.
-Progres i ulët në arsim, infrastrukturë dhe nevojë për ristrukturim të trajnimit profesional.
-Mungesë transparence në prokurimin publik shoqëruar me një shifër të lartë të Papunësisë (që mbett në 17.5%) si edhe rritja e nivelit të Kredive të Këqija shoqëruar me uljen e kredidhënies dhe eksportimin e kapitalit monetar nga bankat e nivelit të dytë jashtë vendit.

Për ta thënë më troç; kemi ngelur në klasë megjithëse qeveria pretendon se jemi në udhën e duhur. Jo më kot mbi 200 mijë shqiptarë kanë shënuar një rekord në aplikimet e tyre për Lotarinë Amerikane. Regres Raporti nga Bashkimi Europian do të ishte një kambanë shumë e fortë alarmi për këdo, për këdo përpos kësaj qeverie që mendjen e ka si të ndryshojë formen ndonëse mbetet e kalbur në permbajtje