Kërkohej nga policia për pengmarrje, arrestohet 33-vjeçari

8 Nëntor 2015, 15:54, Aktualitet CNA

Policia e Gjirokastrës ka arrestuar shtetasin Kasëm Buzheri, 33 vjeç, pasi ishte shpallur në kërkim për rrëmbim personi. Mësohet se Gjykata e Shkallës së Parë për Krimet e Rënda Tiranë kishte caktuar masën e sigurisë ?Arrest me burg?. Bëhet me dije se Buzheri do të gjykohet nga Gjykata e Shkallës së Parë Gjirokastër.

RRËMBIMI

Ngjarja ka ndodhur më 4 mars 2012. Nga hetimet ka rezultuar se i dëmtuari Ergest Shele jeton me vëllain e tij Velo Shele në qytetin e Përmetit. Në datën 3 mars, i pandehuri Aleksandër Kalemi i ka telefonuar Ergestit, duke i kërkuar të takoheshin në Gjirokastër. Ai ka pranuar dhe një ditë më pas, rreth orës 08:00, bashkë me vëllain e tij Velon, janë nisur. Aleksandëri i telefononte shpesh për ta pyetur për vendndodhjen. Të dëmtuarit kanë zbritur në vendin e quajtur Ura e Lumit, ku janë takuar me Aleksandërin, i cili ishte me një makinë ?Ford? me xhama të zinj. Ata kanë hipur në makinën e tij dhe të tre kanë shkuar në një lokal afër vendit të quajtur Qafa e Pazarit në Gjirokastër, ku kanë qëndruar rreth 15 minuta dhe me makinën e të pandehurit Aleksandër Kalemi kanë shkuar në drejtim të shkollës ?Naim Frashëri? në lagjen Dunavat. Sapo kanë filluar të zbresin poshtë rrugës, janë ndaluar nga një automjet tip furgon me ngjyrë të bardhë me targa amerikane, që drejtohej nga i pandehuri Arbër Meçi. Në këtë kohë nga furgoni kanë dalë të pandehurit Bledar Muho dhe Kasëm Buzheri, të cilët u janë drejtuar vëllezërve Ergest dhe Kosta me fjalët: ?Mos lëvizni?. Kasëm Buzheri e ka goditur me pistoletë në kokë Ergestin, duke i thënë: ?Më njeh mua? ju që donit të më vidhnit mallin?. Më pas kanë goditur me grushte Ergestin dhe Velon në trup duke i detyruar të hipin në një furgon me ngjyrë të bardhë dhe janë nisur drejt fshatit Lazarat. Në afërsi të fshatit Kordhocë, të dëmtuarit janë detyruar të hipin në automjetin e markës ?Audi Q7? me ngjyrë të zezë, që drejtohej nga Alfons Buzheri dhe kanë vazhduar rrugën për në fshatin Lazarat. Në furgon kanë hipur edhe Kasëm Buzheri, Bledar Muho, Arbër Meçi dhe Aleksandër Kalemi.

Të pandehurit, sipas Prokurorisë së Krimeve të Rënda, i kanë çuar të dëmtuarit në një shtëpi të braktisur në fshatin Lazarat, duke ushtruar ndaj tyre dhunë çnjerëzore. Alfons Buzheri i ka lidhur të dëmtuarin Ergest Shele këmbët dhe duart me tel cingato dhe ka filluar ta godasë me shkelma e grushte duke i thënë: ?Nxirrni mallin, kush e ka marrë?. Më pas, në dhomë kanë hyrë Bako Buzheri, Kasëm Buzheri, Bledar Muho, Arbër Meçi dhe një person tjetër i paidentifikuar, të cilët kanë filluar ta godasin Ergestin me shkelma e grushte dhe i drejtoheshin me fjalët: ?Ku e keni mallin?. Në të njëjtën kohë, agresorët godisnin edhe të dëmtuarin Velo Shele, të cilin më pas e kanë lënë të lirë, duke e kërcënuar me jetën e të vëllait nëse kallëzonte në polici. Alfons Buzheri ka vazhduar të godasë me shkelma e grushte të dëmtuarin Ergest Shele për ta detyruar që të pranonte se ?mallin e kishte vjedhur bashkë me Resul Goxhajn dhe Alban Rustemin?. I dëmtuari Resul Goxhaj i njihte këta shtetas, pasi kishte lidhje shoqërore me ta. Për shkak të dhunës fizike dhe psikike që të pandehurit kanë ushtruar ndaj të dëmtuarit Ergest Shele, ky është detyruar të pranojë që hashashin e kishte vjedhur bashkë me Resul Goxhajn dhe Alban Rustemin. Pas disa orë torturash fizike, ai ka parë në dhomë të dëmtuarin Resul Goxhaj dhe ata e kanë goditur njëherësh Resulin. Për shkak të dhunës, i dëmtuari Resul Goxhaj është detyruar të pranojë se e ka vjedhur ai hashashin dhe pasi ka pohuar këtë fakt, të pandehurit e kanë lënë të lirë. Më pas, të pandehurit kanë lënë të lirë të dëmtuarin Ergest Shele, i cili ka hipur në furgonin e linjës Gjirokastër-Përmet dhe rrugës është shoqëruar nga policia, ku ka kallëzuar edhe ngjarjen.

Policia njoftoi se dënimet për këtë ngjarjë, u bënë të pavlefshme, pasi Gjykata e Lartë prishi vendimet e Gjykatës së Krimeve të Rënda dhe të Apelit dhe e transferuar çështjen për gjykim pranë Gjykatës së Shkallës së Parë Gjirokastër. Akuza ndryshoi nga ?Rrëmbim ose mbajtje pengë e personit në bashkëpunim?, në ? Heqje të paligjshme të lirisë ,në bashkëpunim?.