Tenderat e Ministrisë së Mbrojtjes/ Petro Koçi: Akuzat e PD-së, të pabaza

8 Nëntor 2015, 14:33, Aktualitet CNA

Zv.ministri i Mbrojtjes Petro Koçi ka reaguar ndaj akuzave të opozitës lidhur me tenderat e lëshuara nga Ministria e Mbrojtjes. Përmes një konference për mediat, Koçi tha se akuzat janë të pabaza.

Deklarata e plotë e Petro Koçit

Partia Demokratike ka tre dite që hedh akuza të pabaza ndaj ministrisë së Mbrojtjes nisur nga raporti politik i kontrollit të lartë të shtetit.

Sot opozita konsideroi shkelje blerjen e makinave të blinduara për Policinë ushtarake. Sqarojmë opinionin se:

VKM-ja e tetorit 2008 për prokurimet ushtarake, përcakton qartë procedurat e blerjes dhe prokurimeve nga Ministria e Mbrojtjes të mallrave të përjashtuara nga ligji i prokurimit publik.

Bazuar në VKM, përcaktimi i vlerës së projektit bëhet vetëm nga grupi i punës me ekspertë të fushës dhe pas miratimit nga bordi i modernizimit, alternative që plotëson kushtet teknike më mirë kthehet në projekt të zbatueshëm.

Kjo alternativë e konstatuar nga grupi i punës është përzgjedhur si alternativa më e mirë dhe i është dërguar kompanive të listuara nga NATO për çmim dhe disponibilitet.

Vlen të theksohet se oferta e përzgjedhur si fituese është 530.000 euro më e ulët se oferta fillestare e dhënë nga kompania që vjen nga një vend aleat NATO, kjo falë negociatave të zhvilluara në Ministrinë e Mbrojtjes.

Dy: tenderi për rikonstruksionin e Ministrisë së Mbrojtjes.

Procedura e zhvilluar ka qenë e hapur për të gjithë operatorët e interesuar, konform kuadrit ligjor në fuqi. Në këtë garë kanë marrë pjesë 17 firma, ndërsa fituesi nuk është një shoqëri ashtu siç pretendohet nga Partia Demokratike por bashkimin i dy operatorëve ekonomike.

Të dyja këto shoqëri kanë si objekt të veprimtarisë së tyre tregtare ndërtimin dhe rikonstruksionet e objekteve të ndryshme, lehtësisht e verifikueshme në QKR. Ndodh që një kompani ka licensë edhe për pastrim ndërkohë që ka licensë për të ndërtuar edhe hidrocentrale.

Të dyja shoqëritë kanë licensë për të gjitha kategoritë e kërkuara në zbatimin e kontratës.

Tre: ripërsërisim se në tenderi për blerje, furnizim, instalim dhe vënie në punë të Sistemit të Integruar të Vëzhgimit të Hapësirës Detare, ndryshe sa pretendohet nga PD, kompania e përzgjedhur është përfaqësuesi zyrtar i kompanisë ?GEM Elektronika?, prodhues i radarëve ekzistues. E njëjta kompani, është marrë me mirëmbajtjen dhe riparimin e pajisjeve përgjatë periudhës 2010 – 2011. Ajo është certifikuar nga Drejtoria e Sigurisë Informacioni të Klasifikuar që në vitin 2010, kohë në të cilën ofronte riparimin e radarëve pranë Forcave të Armatosura. Fakti që e njëjta kompani me eksperiencë vazhdon të mirëmbajë rrjetin përbën një avantazh, i cili nuk u shfrytëzua në vitet kur qeveriste Partia Demokratike dhe si pasojë i gjithë vëzhgimi i hapësirës detare u la në errësirë të plotë për të lehtësuar trafiqet e paligjshme.

Do kishim dashur që përfaqësuesit e PD-së të dilnin e të thonin çfarë ndodhi me hapësirën detare dhe sigurinë kombëtare gjatë dy viteve që radarët nuk punuan.

Së fundmi dy fjalë për Kontrollin e Lartë të shtetit. Kemi të dhëna të presionit te ushtruar mbi kontrollorët e KLSH-së të kërcënuar me pushim nga puna nëse do raportonin se veprimtaria e Ministrisë ishte e ?Bardhë? ashtu siç ata raportuan fillimisht. Fatkeqësisht KLSH është kthyer në vegël e industrise se shpifjes nen drejtimin e Bujar Leskajt, deputet i PD qe mesa duket po i shërben me zell partisë së tij për t’u rishfaqur si deputet ne zgjedhjet e ardhshme! Nëse ka një sjellje barbarisht antiligjore sot në një istitucion kjo është sjellja e KLSH. Ka ardhur koha qe shqiptaret ta mësojnë këtë të vërtetë të thjeshtë sepse abuzimi i skajshëm i kryetarit të KLSH me detyrën për t’i shërbyer partisë së tij, nuk mund të bjerë ndesh me respektimin që kjo qeveri i bën ligjeve dhe institucioneve.