E fundit!

09:10 Aktualitet

Deklaratat e kryeministrit gjatë prezantimit të "Smart City"/ Reagon familja e Martin Canit

Familja e Martin Canit, i cili u vra me thikë nga bashkëmo...

Qeveria u heq tarifën e skanimit fasonistëve, ua ngarkon taksapaguesve

27 Tetor 2015, 20:15, Aktualitet CNA

Kuvendi i Shqipërisë filloi sot diskutimin për një propozim të qeverisë, i cili synon të shkarkojë barrën e krijuar nga skanimi doganor për një kategori biznesi, të cilët, për shkak të dinamikës së punës, iu duhej të paguante tarifë skanimi dy apo tri herë për të njëjtin mall. Por pavarësisht se biznesi u shkarkua nga detyrimi i shumëfishtë, paratë që do të mungojnë do të mbulohen nga buxheti i shtetit, d.m.th nga taksapaguesit.

Projektligji i propozuar nga Ministria e Financave thotë se bizneset që i qarkullojnë mallrat njëkohësisht për import dhe eksport, si bizneset e përpunimit aktiv të veshjeve dhe këpucëve, të cilët importojnë lëndë të parë dhe eksportojnë produkte gjysmë të gatshme ose të gatshme, do të paguajnë vetëm një herë tarifën prej 22 eurosh për deklaratë doganore. Gjatë javëve të fundit bizneset fason u ankuan për faktin se kostoja e skanimit doganor është tepër e rëndë për ta për shkak të specifikave të punës. Shumica dërrmuese e fasonistëve importojnë dhe eksportojnë mall në sasi të vogla, duke i shërbyer tregjeve të huaja me produkte me prodhim të ulët, fjala vjen, disa mijëra palë këpucë të një modeli të caktuar. Kjo gjë rrit numrin e deklaratave doganore. Sektori fason ka gjithashtu norma shumë të ulëta fitimi dhe numër të lartë të punësuarish. Rrjedhimisht detyrimi për të paguar dy apo tri herë faturë prej 22 eurosh për deklaratë doganore qe tepër i rëndë.

Skanimi doganor filloi më 7 shtator 2015 me një skaner të instaluar në portin e Durrësit. Teorikisht, skanimi do të ndihmojë qeverinë të luftojë evazionin fiskal apo duke mbrojtur vendin nga lëndët e rrezikshme përmes skanimit të shpejtë të mallrave dhe automjeteve të importuara. Por ndërkohë, bizneset detyrohen të paguajnë edhe në rastet kur skanimi nuk ekziston. Në Shqipëri ka 27 pika doganore ndërsa Rapiscan do të instalojë dy skanera fiks dhe tre të lëvizshëm.

Paguan taksapaguesi

Projektligji i qeverisë do ta ulë koston e skanimit për një kategori biznesesh, por nuk do të ulë përfitimet e kompanisë shqiptaro-amerikane. Sipas kontratës së nënshkruar nga qeveria aktuale, koncesionari do të përfitojë 11.3 milionë euro në vitin e parë dhe pagesa e saj do të rritet me 1.03 për qind në vit deri në vitin e pesëmbëdhjetë, pavarësisht nëse skanimi do të kryhet apo jo apo nëse qeveria do t?i marrë këto para nga bizneset apo jo.

Koncesioni i skanimit u nënshkrua nga qeveria e kaluar e cila përcaktoi një tarifë skanimi prej 39 eurosh për deklaratë doganore, por paratë do të merreshin drejtpërsëdrejti nga biznesi. Qeveria aktuale u përpoq të mos e vërë në zbatim kontratën e koncesionit dhe punësoi zyrën e Cherie Blair, bashkëshortes së ish-kryeministrit britanik Tony Blair, për t?u përballur në arbitrazh, ku Rapiscan kërkonte një dëmshpërblim prej 359 milionë euro.

Pasi shpenzoi 495 mijë euro për konsulencë, qeveria ra dakord me Rapiscan që ta rishqyrtonte marrëveshjen. Sipas qeverisë, kostoja e përgjithshme e koncesionit u ul nga 316 milionë euro në 216 milionë. Por kontrata e re, ndonëse mbart kosto më të ulëta, mbart edhe pagesë fikse për kompaninë koncesionare pavarësisht numrit të faturave. Rapiscan duket se rinegocioi uljen e përfitimit për një pagesë të sigurt mujore për 15 vitet e ardhshme, për një shërbim që nuk dihet se çfarë përfitimesh do t?i sjellë vendit.

Gjergj Erebara është gazetar për BIRN në Tiranë. Ai ka mbaruar studimet për gazetari në Universitetin e Tiranës dhe ka master shkencor (MSC) për Histori Ekonomike nga Universiteti i Lundit. I specializuar për gazetari ekonomike. Erebara ka punuar që nga viti 1998 në disa media të shkruara dhe vizive Shqiptare, si gazetar, redaktor dhe kryeredaktor.