web counter
LEXO PA REKLAMA!

SHKARKO APP

App Store
Google Play

E fundit!

x

Kastriot Myftaraj kunder Edi Manushit dhe Top Channel

16 Tetor 2015, 12:24, Aktualitet CNA

Drejtuesi i emisionit ?Procesi Sportiv? në Top Channel, Edi Manushi i fyeu lojtarët e kombëtares së futbollit duke i quajtur shqipfolës nga trevat shqipfolëse, pra i quajti joshqiptarë

Nga Kastriot Myftaraj

Ditën e hënë, në 12 tetor, në emisionin ?Procesi Sportiv?, në Top Channel qenë të ftuar lojtarët e përfaqësueses shqiptare të futbollit, traineri De Biasi dhe Kryeministri Rama, në shërbim të të cilit ishte ndërtuar ky talk show. Drejtuesi i emisionit paraqiti një hartë, për të cilën shpjegoi se e kishte sjellë, citoj fjalët e Manushit: ?për të parë se nga i kemi lojtarët e kombëtares, vijnë pak a shumë nga të gjitha trevat shqipfolëse. Kjo është një hartë futbollistike, mos ta ngatërrojmë me gjëra të tjera.?
Ky shpjegim do të thotë se ka treva shqiptare, që është territori brenda kufijve shtetërorë të Republikës së Shqipërisë, banorët e të cilave janë ?shqiptarë? dhe ?treva shqipfolëse?, që janë trevat përtej kufijve të Republikës së Shqipërisë, e të cilat sipas Manushit, janë të banuara me shqipfolës, jo me shqiptarë. Pra, futbollistët e kombëtares shqiptare që vijnë nga përtej kufijve të Shqipërisë, nuk janë shqiptarë por ?shqipfolës?. Por një shqipfolës mund të jetë edhe serb. Pikërisht në Top Channel ka qenë i ftuar para disa viteve politikani serb i Kosovës Oliver Ivanoviç, i cili ka folur në gjuhën shqipe, madje në mënyrë shumë më korrekte se Manushi, që e përzien shqipen me spanjishte, italishte, pa përmendur anglishten. Oliver Ivanoviç, i cili sot është në burg për krime lufte ndaj shqiptarëve të Kosovës, është padyshim një shqipfolës. Domethënë Edi Manushi e barazoi Lorik Canën, Etrit Berishën, Taulant Xhakën, Ermir Lenjanin e lojtarët e tjerë të kombëtares nga Kosova me Oliver Ivanoviçin, serbin shqipfolës. Fjalët e mësipërme Manushi i tha duke iu drejtuar Kryeministrit Rama, i cili nuk e gjeti të arsyeshme ta kundërshtonte atë.
Ndonëse Manushi tha se nuk duhet ta ngatërrojmë hartën me gjëra të tjera, duke nënkuptuar ndryshimin e kufijve shtetërorë, ai u ngatërrua pikërisht në gjëra të tjera, por në dëm të shqiptarëve si komb.
Kryeministri Rama mund dhe duhet ta kishte kundërshtuar Manushin, duke ruajtur dhe korrektesën gjeopolitike, sepse shqiptarët, në Kosovë po se po, por edhe në Maqedoni, Luginën e Preshevës, pra në trojet nga vinë lojtarët e kombëtares shqiptare, janë të njohur ligjërisht si shqiptarë, jo si shqipfolës. Sipas nenit 3 të Kushtetutës së Kosovës, Republika e Kosovës përbëhet nga shqiptarët (jo nga shqipfolësit) dhe komunitetet e tjera. Në dokumentet zyrtare të shtetit maqedon, shqiptarët e Maqedonisë quhen ?shqiptarë? dhe jo ?shqipfolës?. Edhe në dokumentet zyrtare të Serbisë, shqiptarët e Luginës së Preshevës quhen ?shqiptarë? dhe jo ?shqipfolës?. Pra, Shqipëria nuk ka përse i quan ?shqipfolës? bashkëkombasit e vet, që jetojnë në trevat e tyre përtej kufirit shtetëror.
Harta që paraqiti sharlatani Manushi ishte në fakt harta e flamurit të zi të dronit të Beogradit. Në hartë ishte edhe Sanxhaku, por edhe ishulli grek i Korfuzit, i shënuar me të kuqe, ndonëse nga këto dy territore nuk ka asnjë lojtar në përfaqësuesen shqiptare. Madje ironikisht, nga Sanxhaku është lojtari i përfaqësueses serbe, sllavo-muslimani Adem Ljajiç, i cili pati rol vendimtar në fitoren e Serbisë në Elbasan ndaj Shqipërisë, sepse jo vetëm ishte autor i drejtpërdrejtë i golit të dytë, por kontribuoi në mënyrë vendimtare në golin e parë. Manushi nuk e shpjegoi se përse ishte Sanxhakun në hartën e tij ?sportive?, apo për kortezi sportive ndaj Adem Ljajiç?
Harta që paraqiti Manushi pra nuk ishte një hartë sportive siç tha ai, por ishte një hartë absurde që nuk ka lidhje as me trojet ku shqiptarët kanë qenë autoktonë dikur, siç thoshte mbishkrimi i hartës kur u shfaq në flamurin e zi të dronit, pasi kjo hartë nuk përmbante Judbinën, trevën e Eposit të Kreshnikëve, Mujit dhe Halilit, e cila gjendet thellë në territorin e Kroacisë së sotme në regjionin e Likës, në lindje të qytetit të Zadarit. Harta e flamurit të zi ishte hartë vetëm paksa e kamufluar e khalifatit islamik të Ballkanit, duke qenë se përfshinte Sanxhakun islamik, si urë lidhëse me Bosnjën islamike.
Manushi i fyeu rëndë lojtarët e kombëtares nga trevat jashtë kufijve shtetërorë të Shqipërisë dhe shqiptarët e trevave nga vinë ata. Prandaj lojtarët e kombëtares duhet të reagojnë duke thënë se Manushi dhe Top Channeli duhet që të kërkojë ndjesë për fyerjen. Jo vetëm Manushi se edhe Top Channel e përdor rëndom fjalën ?shqipfolës? për shqiptarët e përtej kufirit. Nëse nuk kërkohet ndjesë, atëherë lojtarët e kombëtares duhet të shpallin bojkotin ndaj Top Channel.





Lajmet e fundit nga