Bushati takime me liderët e naftës dhe gazit botëror në Nju Jork

26 Shtator 2015, 09:35, Aktualitet CNA

Ministri i Punëve të Jashtme, Ditmir Bushati, është në Nju Jork për të ndjekur punimet e Sesionit të 70 të Asamblesë së Përgjithshme të OKB.

Ai ka zhvilluar takime të rëndësishme me homologët e Katarit, Azerbajxhanit, Irakut dhe Malajzisë.

Në takimin me homologun nga Katari, ministrat njëzëri u shprehën se ecuria e suksesshme e marrëdhënieve politike duhet të avancohet me realizimin e projekteve konkrete të bashkëpunimit ekonomik.

Bushati e falënderoi ministrin e Katarit, Al Attiyah për mbështetjen e deritanishme dhënë ndaj Kosovës dhe inkurajoi qe te vijohet kjo mbështetje dhe me kërkesën e Kosovës për t?u pranuar në UNESCO.

Në takimin me homologun e Republikës së Azerbajxhanit, Elmar Mammadyarov, palët u ndalën në zgjerimin e bashkëpunimit në fushën ekonomike, veçanërisht në sektorin e energjetikës dhe perspektivës që është hapur me realizimin e projektit TAP. Bushati u shpreh se ky projekt ofron një shpërndarje më të ekuilibruar të energjisë dhe burimeve të saj në rajon dhe më gjerë. Gjithashtu ai falënderoi qeverinë azere për mbështetjen e dhënë për TAP-in, si projekti me fizibël dhe me interes për vendin tonë dhe mbarë rajonin e Ballkanit.

Gjatë ditës së parë në Nju Jork, Bushati u takua edhe me homologun e tij irakian Al-Jaafari, si dhe me atë nga Malajzisë. Jaafari vlerësoi kontributin e Shqipërisë si pjesëtare aktive e Koalicionit Ndërkombëtar kundër Terrorizmit dhe ne këtë kuadër evidentoi nevojën e një bashkëpunimi e koordinimi sa më të mirë të përpjekjeve ndërkombëtare në luftën kundër terrorizmit.

Në takimin me ministrin e Jashtëm të Malajzisë, Bushati i u ndal në fushat ku vendi ynë ofron mundësi për investime duke theksuar angazhimin e qeverise shqiptare ne krijimin e lehtësive te nevojshme për investitorët e huaj.