E fundit!

12:23 Aktualitet

Ja kush e merr drejtimin e Policisë së Vlorës

Edvin Ndreu, i renditur me 84 pikë në garën për drejtoritë...

Crown Agents publikon sukseset ne Dogana, goditje kontrabandes dhe korrupsionit

26 Gusht 2015, 13:39, Ekonomi CNA

?Crown Agents?, kompania britanike e akuzuar nga opozita për dështim dhe aferë korruptive me qeverinë, i cilëson rezultatet e saj në doganat shqiptare si suksese.

Në një njoftim zyrtar, kompania konsulente deklaron se, në gjysmën e parë të vitit ka arritur suksese të konsiderueshme në dy drejtime: së pari, në goditjen e kontrabandës dhe rritjen e të ardhurave në buxhet dhe, së dyti, në zbulimin e korrupsionit në stafin e doganave.

Në lidhje me luftën kundër evazionit, ?Crown Agents? bën të ditur se në periudhën Janar-Qershor kreu 4900 inspektime në terren, në të cilat konstatoi 1370 raste shkeljesh apo evazioni. Sipas saj, zbulimi i këtyre shkeljeve solli 6.4 milionë euro të ardhura në buxhet dhe pritshmëritë janë që shifra të shkojë në 11 milionë, pas përfundimit të procedurave ankimuese.

Këto rezultate, sipas kompanisë, janë një dëshmi e qartë e leverdisshmërisë ekonomike të kontratës, me përfitime të menjëhershme për Shqipërinë. Duke zbërthyer më në hollësi rezultatet e aksioneve, ?Crown Agents? pretendon se ka goditur kontrabandën si te cigaret, ashtu edhe tek alkooli dhe karburantet.

?Crown Agents?: Mbi 80 zyrtarë u dorëhoqën ose u shkarkuan

Por, lufta ndaj kontrabandës dhe rritja e të ardhurave nuk janë drejtimi i vetëm, në të cilin kompania pretendon sukses. Një tjetër drejtim është ai i luftës ndaj korrupsionit.

Për herë të parë, kompania deklaron në publik se, hetimet e asistuara prej saj kanë çuar në zbulimin e një grupi prej 80 zyrtarësh të korruptuar në dogana, të cilët janë dorëhequr ose u janë nënshtruar sanksioneve të tjera. Në njoftim, kompania nuk ka dhënë hollësi mbi zyrtarët e hetuar dhe të kapur në korrupsion, por muajt e fundit nga doganat ka pasur largime të bujshme deri në nivelet më të larta.

Në fund të njoftimit, ?Crown Agents? shpreh mbështetjen për aksionin antievazion të lajmëruar nga Qeveria dhe njeh se ka ende shumë punë për të bërë. Kjo deklaratë e kompanisë britanike pritet të nxehë më tej debatin, veçanërisht atë politik, mbi situatën në tatime dhe dogana.

Në fund të muajit të kaluar, për shkak të mosrealizimeve të thella, Qeveria shkurtoi me 22 miliardë planin e të ardhurave nga Tatimet dhe Doganat. Opozita e ka cilësuar rishikimin e buxhetit si aktin, që legjitimoi grabitjen e 160 milionë dollarëve nga Qeveria.

Dhe, vetëm pak ditë para se Qeveria të shkurtonte buxhetin, udhëheqësi i opozitës Lulzim Basha akuzoi publikisht ?Crown Agents? si bashkëpërgjegjëse, duke e quajtur kontratën e saj me qeverinë një dështim që mbante erë korrupsioni.