Tension në PS e Shkodrës, Paulin Sterkaj: Tom Doshi nuk përfaqëson më PS, një ditë thotë jam me mazhorancën, një ditë me PD

3 Qershor 2015, 06:42, Politikë CNA

Angazhimi i Tom Doshit në fushatë, në Qarkun e Shkodrës, me sa duket me miratimin në heshtje të kryeministrit Edi Rama, është kthyer në shqetësim për mazhorancën qeverisëse, pasi mund të provokojë një ftohje raportesh mes Partisë Socialiste dhe Lëvizjes Socialiste për Integrim, partinë që mban në pushtet PS.

Deputeti me influencë të madhe në Veri, i përjashtuar nga grupi parlamentar socialist, befas ka vendosur të angazhohet në fushatë, në krah të kandidatit socialist për Vaun e Dejës, duke krijuar një siguri shtesë për fitoren e kësaj njësie bashkiake. Por, deputeti Doshi, në të njëjtën kohë ka nisur një ofensivë sulmesh kundër Ilir Metës, LSI në Shkodër dhe Keti Bazhdarit, duke krijuar një situatë të paqartë dhe të turbullt në Shkodër.

Akuza sistematike në adresë të Ilir Metës mund të lexohen edhe si një sfidë që Partia Socialiste po i bën Lëvizjes Socialiste për Integrim. Në këto kushte, deputeti Doshi, me angazhimin e tij, duket se më shumë po i shkakton dëm se sa po e ndihmon Partinë Socialiste në njësitë e Shkodrës. Në këto kushte, deputetët e Partisë Socialiste të Qarkut të Shkodrës mësohet se janë shprehur kundër angazhimit dhe përfshirjes së deputetit Doshi në këtë fushatë, aq më tepër me kërkesë të kandidatëve të së majtës.

Sipas burimeve, pas shfaqjes së Doshit në Shkodër situata në PS e këtij qarku është e tensionuar. Ndonëse gjithçka po luhet në mënyrë të nëndheshme, nuk kanë munguar as qëndrimet publike të disa deputetëve. Deputetët e PS thonë se deklaratat e Doshit nuk përfaqësojnë më Partinë Socialiste.

Paulin Sterkaj

Deputeti i Partisë Socialiste për Qarkun e Shkodrës, Paulin Sterkaj, ka shigjetuar dje deputetin Tom Doshi. Deputeti Sterkaj, i cili ka paralajmëruar një fitore të PS në Qarkun e Shkodrës, ka pohuar se Tom Doshi tashmë është një elektron i lirë. Sterkaj shtoi se Tom Doshi një herë thotë se është me PS dhe një herë se është PD.

?Tom Doshi është një elektron i lirë, nuk është më asgjë e jashtëzakonshme! Atij i ka humbur grosha dhe nuk po e gjen dot. Në Malësinë e Madhe një herë thotë jam me PS, një herë me PD. Qëndrimet e tij nuk përfaqësojnë PS?, ka deklaruar Sterkaj. Deputeti Sterkaj ka shprehur edhe një herë bindjen se aleanca e majtë do të fitojë bindshëm edhe këtë radhë në Qarkun e Shkodrës. Po ashtu, Sterkaj ka pohuar se koalicioni qeverisës është i qëndrueshëm dhe po koordinohet mjaft mirë në këto zgjedhje lokale.