Rrëfehet italiani i Kamorra-s: Me vëllezërit Sulku kam 15 vjet miqësi

2 Qershor 2015, 06:52, Aktualitet CNA

Në Shqipëri erdha sepse familja e Durimit do të organizonte një përkujtimore për vdekjen e djalit të tyre në Holandë. Më parë kam ardhur për të takuar Besnik Sulkun dhe familjarët e tij.

Italiani Salvatore Leticia, i dyshuar si pjesë e një klani mafioz të lidhur me ?Kamorra?-n në Itali, ka pranuar të japë disa detaje për hetuesit që kanë në dorë dosjen e masakrës me tre të vrarë në Tiranë, ngjarje e ndodhur më 27 maj. 32-vjeçari ka deklaruar se ai kishte miqësi prej të paktën 15 vitesh me vëllezërit Besnik dhe Durim Sulku, tashmë të dy të vrarë, njëri në Tiranë e tjetri në Roterdam të Holandës.

Shtetasi italian nuk ka treguar detaje rreth mënyrës së njohjes me dy vëllezërit shqiptarë, por është mjaftuar me faktin se me ta i lidh një miqësi e hershme. I dyshuari si vrasës me pagesë ka treguar për hetuesit se herën e fundit në Tiranë ka ardhur më datë 27 maj, pak orë përpara masakrës që ndodhi në zonën e Trenit.

Këtë udhëtim ai e ka justifikuar me faktin se familja e Durim Sulkut, i vrarë në Holandë më 6 prill të këtij viti, do të organizonte një ceremoni përkujtimore për djalin e tyre. Si mik i Besnikut dhe i Durimit, ai ka ardhur në Tiranë për të qenë pranë familjes së miqve të tij, të cilët po kalonin momente të vështira.

Lidhur me ngjarjen, Salvatore Leticia ka thënë për llogari të hetimit se ai ndodhej në vendngjarje së bashku me Besnik Sulkun, por nuk ka qëlluar askënd. Sipas tij, ai ka qëlluar vetëm në ajër dhe ka tentuar të largohet pasi ka parë atë që ndodhi. Por kjo pjesë e rrëfimit të shtetasit italian kundërshtohet nga provat e mbledhura prej prokurorisë, e cila e akuzon atë si bashkëpunëtor në vrasjen e shtetasve Mentor Doçi dhe Gerti Goxhaj.

Fillimisht shtetasi italian është fiksuar nga kamerat e një biznesi pranë vendit të ngjarjes teksa mbushte një pistoletë tip ?Glok?, e cila rezulton të ketë qëlluar në vendin e ngjarjes. Më pasi ai është larguar prej aty në tentativë për t?u fshehur pranë një hoteli, ndërsa pas arrestimit tregoi se armën e kishte hedhur në një kazan plehrash.

Një tjetër provë që sipas hetuesve implikon 32-vjeçarin italian në krim është edhe fotoja e Mentor Doçit, që iu gjet atij në xhepin e xhupit. I pyetur lidhur me udhëtimet e mëparshme që ai ka patur në Shqipëri përgjatë muajve prill dhe maj, italiani ka thënë se ishte njoftuar për vrasjen e Durim Sulkut në Holandë dhe kishte ardhur pranë familjes së tij për të shprehur ngushëllimet.

I dyshuari për vrasje ka shprehur frikë për jetën, pasi mund të rrezikohet gjatë kohës që mbahet i izoluar në paraburgim. Për të parandaluar ndonjë ngjarje të mundshme, autoritetet kanë shtuar masat e sigurisë në qelinë ku mbahet Salvatore Leticia, si dhe në qelinë ku janë të izoluar nipat e Mentor Lufit./Mapo