Një plan realist për Durrësin

22 Maj 2015, 04:43, Opinione CNA

Nga Grida Shqina (Duma)

Linda dhe u rrita në qytetin tim me histori 3 mijëvjeçare me krenarinë e ligjshme që kam bashkëjetuar në çdo çast të jetës sime, në të njëjtën hapësire dhe truall që ka qenë për shekuj të tërë, teatër i lavdishëm i shkëlqimit të antikitetit botëror.
Në një muaj fushatë kam shtrenguar duart me mijëra nga bashkëqytetarët e mi. Një gjë është e qartë. Mijërat e duarve dhe mijërat e fjalëve që kam dëgjuar, më kumbojnë si një rrënkim dhe si një dhimbje.
Fatmirësisht të shoqëruara me mijëra shpresa. Sepse në të vërtetë, janë me mijëra shanset e mëdha që Durrësi ka, si diamante të vyera në gjirin e vet.
Në kontrast të frikshëm me pasuritë dhe mundësitë reale që Durrësi ka, papunësia dhe varfëria në këtë qytet plot me thesare, bën kërdinë.
Si ka mundësi që me pasuritë arkeologjike që Durrësi ka, me bregdetin e tij të mrekullueshëm, me begatinë e tokave të veta bujqësore, me traditën shumëvjecare të turizmit, që është në të vërtetë një legjendë e vërtetë kombëtare, Durrësi pra, të rrënkojë dhe të vuajë kësisoj?
Pas 15 vitesh, tani është koha të ndryshojmë gjithëçka. Si kryetare bashkie do i kthej prestigjin e munguar Durrësit.
Ne kemi një plan realist për Durrësin me një vizion afatgjatë.
Do të rivlersojmë pasuritë arkeologjike.
Do të ulim taksat bashkiake me 30 %, që të nxisim punën dhe sipërmarrjen.
Do të kemi fond për sigurimet e të rinjve të sapunësuar dhe grave në nevojë për paga më të mira.
Do të mirëmbajmë bregun dhe do të pastrojmë detin, do rikthejmë plazhin publik, të hapur dhe gratis për të gjithë.
Do të ndërtojmë akuariumin e madh të Durrësit dhe qendrën e madhe artistike polifunksionale.
Do të trokas derë më derë në të gjitha institucionet europiane dhe do të sjell grante miliona euro që digjen, nga mungesa e vullnetit dhe ekspertizës, që fatmirësisht unë kam.
Me 21 qershor Durrësi do të ketë realisht pra, më shumë punë dhe dinjitet!