Ndërkombëtarët të shqetësuar për kandidaturat e inkriminuara

12 Maj 2015, 07:15, Politikë CNA

Në një kohë kur kandidatët e inkriminuar janë kthyer në mollë sherri mes politikës së Tiranës dhe ndërkombëtarëve, përfaqësues të lartë të Kongresit Amerikan kanë zhvilluar takime të paplanifikuara me faktorë të rëndësishëm të politikës shqiptare. Kryetari i Kuvendit, Ilir Meta, faktori i dytë më i rëndësishëm i shumicës në pushtet, ka udhëtuar dje drejt Shkodrës, për të takuar Kryetarin e Nënkomitetit për Evropën, Euroazinë dhe Kërcënimet e Reja në Kongresin Amerikan, Dana Rohrabacher dhe kryetarin e stafit të Komitetit, Paul Behrends. Dy zyrtarët e lartë amerikanë shoqëroheshin nga ambasadori amerikan në Tiranë, Donald Lu.

Sipas burimeve, takimi i kryetarit të Kuvendit me dy zyrtarët e lartë amerikanë është zhvilluar në Hotel Grand në Shkodër. Në fokus të bisedës ka qenë situata parazgjedhore, tensionet politike, raportet me opozitën dhe çështja e dekriminalizimit. Përfaqësuesit e Kongresit Amerikan e shohin Metën si faktor stabiliteti dhe interlokutor mes dy kampeve politike në vend. Në takimin në Shkodër duket se është diskutuar edhe mbi mundësinë e ndërhyrjes së Metës për të zbutur raportet me opozitën, me qëllim për të krijuar një frymë më konstruktive dhe bashkëpunuese para zgjedhjeve. Po ashtu, Meta kërkoi nga z. Rohrabacher një angazhim dhe mbështetje më të madhe nga SHBA në fushën e zhvillimit ekonomik, nxitjes dhe rritjes së investimeve amerikane në Shqipëri. Meta theksoi se nënshkrimi i marrëveshjes për heqjen e taksimit të dyfishtë mes dy vendeve tona, do të ishte një nxitje dhe kontribut konkret në këtë drejtim. Rohrabacher falënderoi z. Meta për takimin dhe i shprehu mirënjohjen e SHBA për rolin dhe kontributin që Shqipëria jep përkrah SHBA, NATO-s dhe aleatëve të tjerë në luftën kundër terrorizmit.

Takimi me Lulzim Bashën

I informuar për prezencën e zyrtarëve të Kongresit në Shqipëri, edhe kryetari i opozitës, Lulzim Basha, është vënë në lëvizje si dhe ka kërkuar një takim. Pas insistimit të Bashës me anë të Fatmir Mediut, dy zyrtarët e Kongresit Amerikan kanë pranuar të takojnë dje Lulzim Bashën.

Sipas burimeve, takimi është zhvilluar në Lezhë. Ashtu siç edhe bëri me dije vetë SHQUP në një njoftim për shtyp, çështja e dekriminalizimit ka qenë arsyeja kryesore e takimit të zyrtarëve amerikanë me Lulzim Bashën. Edhe pse në njoftimin e SHQUP pasqyrohet vetëm fjala e Bashës, zyrtarët amerikanë i kanë kërkuar kryetarit të opozitës ndryshimin e disa kandidatëve të inkriminuar deri në datë 13 Maj. Ndërkaq, konflikti duket se është i pashmangshëm. Partia Demokratike, me kryetar defakto Sali Berishën, nuk ka ndërmend të zëvendësojë të paktën 8 kandidatë të saj, të skeduar me rekorde kriminale. Konflikti me dekriminalizimin Raportet mes politikës së Tiranës dhe Perëndimit mund të njohin një kthesë të rrezikshme ditën e nesërme, pra në 13 Maj, datë kjo që përkon me përmbylljen e listave për zgjedhjet e 21 Qershorit dhe fundin e afatit ultimativ të BE-SHBA, për largimin e kandidatëve me rekorde të mundshme kriminale. Aktualisht, klima është dramatike dhe provokuese. Ambasadori amerikan, Donald Lu, në emër të SHBA, paralajmëroi se ishte hera e fundit që do të përsëriste kërkesën për largimin e kandidatëve të inkriminuar, ndërsa ambasadorja e Bashkimit Evropian në Tiranë, Romana Vlahutin, u la vetëm një javë afat mazhorancës dhe qeverisë shqiptare që të zëvendësojnë kandidatët e inkriminuar.

Ambasadorja tha se pas datës 13 Maj, BE-SHBA do të flasin ndryshe. Pavarësisht se ka mbetur vetëm një ditë nga skadimi i ultimatumit, në dy kampet kryesore të politikës nuk ka lëvizur asgjë, me përjashtim të tërheqjes së një kandidati të PD, i cili nuk është përfolur dhe lakuar për të kaluar të dyshimtë. Gjatë javës së kaluar, mësohet se prezenca amerikane në Tiranë dhe përfaqësia diplomatike e Brukselit, kanë çuar në tavolinën e Edi Ramës dosjet e të inkriminuarve në qeveri, Parlament dhe në listat për 21 Qershorin.

Loja me procedurat e KQZ

Partia Demokratike ka sajuar një alibi për të justifikuar para ndërkombëtarëve pamundësinë e ndryshimit të kandidatëve të inkriminuar nga lista e zgjedhjeve të 21 Qershorit. PD, ashtu si edhe PS, ka regjistruar me shpejtësi kandidatët e dyshimtë në KQZ. Ligji parashikon që kandidati nuk mund të ndryshohet pasi të regjistrohet. Gjithsesi, sipas burimeve, zëvendësimi i kandidatëve të dyshimtë është në dorën e Sali Berishës. Ky i fundit ka refuzuar ndryshimin e emrave, pavarësisht presionit në rritje të ndërkombëtarëve.