KQZ zëvendëson 8 deputetë në Kuvendin e Shqipërisë, ja ligjvënësit e rinj

7 Maj 2015, 08:30, Politikë CNA

Tetë deputetë të rinj do të shkelin për herë të parë në Kuvendin e Shqipërisë. Ligjvënësit e rinj janë mandatuar nga Komisioni Qëndror i Zgjedhjeve, pas kandidimit të 8 deputetëve për bashkitë e vendit, në kuadër të zgjedhjeve lokale. Kështu, vendin e Ardian Turkut që kandidon në Elbasan për Partinë Demokratike do ta zërë Arbiola Halimi; vendin e lënë vakant nga Artur Bushi që kandidon në Krujë për Partinë Socialiste do ta zërë Shkëlqim Troplini.

Në Tiranë, vendin e Halim Kosovës që kandidon për PD do ta zërë Asllan Dogjani, ish-deputeti socialist që rikthehet në Parlament nën siglën e PD pas 2 vjetësh mungese. Në Shkodër, pas dorëheqjes së Voltana Ademit që kandidon për PD, vjen Irma Kopliku. Në Fier, në vend të Majlinda Bufit që kandidon për PS në Roskovec, vjen Antoneta Dhima. Vendin e Miranda Rirës që kandidon në Prrenjas e zë Edlira Çekrezi e LSI. Ndërsa vendin e Armando Subashit që kandidon për PS në Fier e merr Bujar Çela.

Nga Qarku i Kukësit vjen Mimoza Hajdarmataj që zëvendëson Besnik Dushajn, i cili kandidon për PD-në. Ligjvënësit e rinj kanë marrë konfirmimin e organit më të lartë zgjedhor, i cili nëpërmjet një projektvendimi miratoi zëvendësimin e tyre me deputetët që dhanë dorëheqjen në funksion të zgjedhje lokale. Albert Çaçi Komisioni Qëndror i Zgjedhjeve, gjatë mbledhjes së djeshme, regjistroi Albert Çaçin, si kandidat i propozuar nga Partia Socialdemokrate e Shqipërisë, për kryetar të Bashkisë Fier, për zgjedhjet për organet e qeverisjes vendore të datës 21.06.2015?. Ndërkaq, Komisioni Qendror i Zgjedhjeve mori në shqyrtim edhe ankesën e depozituar nga Partia Social Demokrate, për zgjedhjet për organet e qeverisjes vendore të 21 qershorit.

Mosregjistrimi i kandidatit të PSD-së në Rrogozhinë është bërë shkak për diskutime, gjë që ka bërë KQZ të shtyjë mbledhjen. Sipas përfaqësuesve të Partisë Social Demokrate, KZAZ e Rrogozhinës nuk ka pranuar kërkesën e kësaj partie për regjistrimin e kandidatit për zgjedhjet lokale të 21 qershorit. Duke e cilësuar të padrejtë mosregjistrimin e kandidatit të kësaj force politike nga KZAZ, Partia Social Demokrate e Skendër Gjinushit ka kërkuar nga KQZ zgjidhjen e kësaj situate.

Gjithashtu, KQZ mori në shqyrtim edhe projekt-vendimin ?Për verifikimin e listave shumemërore të kandidatëve për anëtar në Këshillin e Bashkisë Durrës, të depozituar nga Partia Social Demokrate, e cila kandidon më vete, për zgjedhjet për organet e qeverisjes vendore të datës 21.06.2015?. KQZ vendosi kthimin për korrigjim të dokumentacionit të kandidimit për listën shumëemërore të kandidatëve për këshillin e Bashkisë Durrës, të Partisë Socialdemokrate. Bordi i Monitorimit

Përveç regjistrimit të kandidatëve në zgjedhjet vendore të 21 qershorit, dhe plotësimit të vendeve vakante të disave prej tyre që janë edhe deputetë, KQZ shqyrtoi dhe miratoi në mbledhjen e djeshme edhe projektvendimin ?Për ngritjen e Bordit të Monitorimit të Medias për monitorimin e fushatës zgjedhore në radion dhe televizionin publik dhe ato private?. Kodi Zgjedhor (neni 85, pika 1) parashikon ngritjen nga KQZ, të BMM-së, 40 ditë përpara fillimit të periudhës zgjedhore. Bordi ka për detyrë monitorimin e zbatimit të dispozitave të këtij kodi për fushatën zgjedhore në radion dhe televizionin publik dhe ato private. Projektvendimi propozonte përbërjen prej 6 anëtarësh të BMM-së dhe konkretisht: Basir Çollakun, Florian Seriani, Maklen Misha, Vilson Kuçi, Rexhep Polisi dhe Klarita Bajraktari, të cilët janë emra që operojnë në fushën e medias.