Xhaçka: Basha e ka lënë kryeqytetin në gjendje të mjerueshme

27 Prill 2015, 11:51, Politikë CNA

Deputetja e PS, Olta Xhaçka në një deklaratë për media tha se edhe Halim Kosova ka filluar të kuptojë se problemi më i madh i Tiranës në këto 4 vjet ka qëne vetë Lulzim Basha.

Xhaçka tha se me të drejtë kandidati i Lulit ngriti sot shqetësimin për për gjendjen e mjerueshme të rrugëve të kryeqytetit.

Deklaratë për media e deputetes së PS, Olta Xhaçka

Është për t?u përshëndetur fakti që edhe kandidati i vetëm që pranoi të kandidojë në vend të Lulit në Tiranë ka filluar ta kuptojë se problemi më i madh i Tiranës në këto katër vjet ka qenë vetë Luli.

Me të drejtë kandidati i Lulit ngriti sot shqetësimin për gjendjen e mjerueshme të rrugëve të kryeqytetit. Jemi plotësisht dakord me të: ashtu si në çdo gjë tjetër Lulzim Basha ka dështuar edhe me rrugët. Madje ka dështuar keq duke i kthyer rrugët e kryeqytetit në një gjendje që qytetarët nuk e kishin parë që prej fundit të viteve 90.

Me të drejtë kandidati i Lulit për Tiranën ngriti shqetësimin për mungesën e tregjeve moderne dhe për gjendjen e mjerueshme të tregjeve ekzistuese. Por në vend që të ankohet përpara qytetarëve që e vuajnë këtë situatë çdo ditë, do të bënte mirë t?ia drejtonte këto shqetësime shefit të tij, atij që e kandidoi në Tiranë. Dhe teksa e pyet për tregjet e rrugët, le t?i bëjë Lulit edhe një pyetje për gënjeshtrën mbi uljen e taksave të cilën e trumbetoi aq shumë, por as nuk u përpoq ndonjëherë ta bëjë realitet.

Ka në skizofreni qesharake sot në PD. Në njërën anë kemi zëdhënëset e Lulit që flasin për vizione moderne të Kryetarit me tram, bulevard të ri e karta studentore. Në anën tjetër, kemi kandidatin e vetëm që pranoi të kandidojë në vend të Lulit për Tiranën i cili nga dita në ditë po mëson se nuk ka mundësi të bëjë asnjë premtim, të paraqesë asnjë platformë pa denoncuar dështimet e kryetarit të Partisë së tij.

Lulzim Basha ka dështuar. Lulzim Basha u tërhoq nga gara si frikacak sepse i kishte të qarta përmasat e dështimit të tij. I vetmi zhvillim pozitiv është se sot, kandidatit të tij i janë hapur sytë dhe po e sheh edhe ai dështimin e Lulit.

Në 21 qershor kjo estradë e Partisë Demokratike merr fund, bashkë me makthin e Kryeqytetit të quajtur Lulzim Basha. Qytetarët do të votojnë për të ardhmen e qytetit të tyre sepse Tiranës i duhet një kryetar bashkie që ta çojë në drejtimin e duhur.