web counter
LEXO PA REKLAMA!

SHKARKO APP

App Store
Google Play

E fundit!

x

Qeveria dhe bankat zgjerojnë borxhin e jashtëm

4 Prill 2015, 18:24, Ekonomi CNA

Borxhi i jashtëm i ekonomisë shqiptare u rrit me 8% gjatë vitit 2014, duke prekur shifrën e afro 6.7 miliardë eurove.
Sipas të dhënave nga Banka e Shqipërisë, faktori kryesor që ka ndikuar në rritjen e borxhit ka qënë zgjerimi i huamarrjes së jashtme të qeverisë. Kryesisht falë programit të bashkëpunimit me Fondin Monetar Ndërkombëtar dhe Bankën Botërore, stoku i borxhit të jashtëm të qeverisë ka arritur në 2.65 miliardë euro, 15.6% më shumë krahasuar me një vit më parë. Janë gjithsej 358 milionë euro që qeveria i ka shtuar në bilancin e borxhit të jashtëm gjatë vitit 2014. Programi i bashkëpunimit me Fondin Monetar Ndërkombëtar dhe Bankën Botërore u ndërmor për të siguruar hua me kushte të buta, me qëllimin kryesor shlyerjen e detyrimeve të prapambetura ndaj sektorit privat, detyrime që kalonin shumën e 500 milionë eurove. Rritje të borxhit të jashtëm gjatë vitit të kaluar regjistroi edhe sektori bankar.
Zbutja e krizës financiare ka bërë që bankat të kenë sërish akses në burimet e jashtme të financimit dhe në fund të vitit 2014 kishin një borxh ndaj jorezidentëve në vlerën e 1.2 miliardë eurove, në rritje me 13% ndaj vitit 2013. Jashtë sistemit financiar, sektori privat në përgjithësi regjistroi rritje modeste të huamarrjes së jashtme. Borxhi i jashtëm i bizneseve private kishte vlerën e 1.16 miliardë eurove, 6.5% më shumë krahasuar me një vit më parë. Ndërkohë, një zë që pësoi rënie të ndjeshme gjatë vitit të kaluar ishte huaja e ndërsjelltë mes koorporatave, në formën e borxhit që ndërmarrjet shqiptare kanë kundrejt aksionerëve dhe investitorëve të tyre jashtë vendit. Këto detyrime në fund të vitit 2014 kishin vlerën e 1.57 miliardë eurove, në rënie me 5% krahasuar me vitin 2013.





Lajmet e fundit nga