web counter
LEXO PA REKLAMA!

SHKARKO APP

App Store
Google Play

E fundit!

x

Këshilli Mbikëqyrës miraton raportin vjetor

25 Shkurt 2015, 17:53, Ekonomi CNA

Këshilli Mbikëqyrës i Bankës së Shqipërisë ka miratuar raportin vjetor të veprimtarisë së institucionit gjatë vitit 2014. Ky raport është detyrimi ligjor i Bankës së Shqipërisë me anë të të cilit realizohet llogaridhënia para Kuvendit të Shqipërisë. Në raportin vjetor bëhet transparente para publikut dhe Kuvendit, aktiviteti i Këshillit Mbikëqyrës dhe i Bankës së Shqipërisë në përmbushje të objektivave të saj institucionale, monetare, valutore, mbikëqyrëse, operacionale dhe zhvillimore.
Më konkretisht në të janë pasqyruar zhvillimet e përgjithshme makroekonomike në vend; Politika monetare dhe ajo valutore të ndjekura nga Banka e Shqipërisë; Zhvillimet në tregjet financiare dhe rreziqet potenciale me të cilat përballet stabiliteti financiar; Aktiviteti mbikëqyrës, licencues dhe rregullator; Aktiviteti i emisionit monetar, sistemit të pagesave, kërkimor, komunikues dhe edukimit të publikut; Administrimi i burimeve njerëzore dhe shërbimeve logjistike; Veprimtaria e kontrollit të brendshëm. Bilanci kontabël, pasqyrat financiare dhe deklarata e auditorit të jashtëm dhe objektivat kryesore të institucionit për vitin 2015.

Pas miratimit të tij nga ana e Kuvendit të Shqipërisë, raporti do të publikohet në faqen zyrtare të internetit të Bankës së Shqipërisë. Në mbledhjen e radhës të Këshillit Mbikëqyrës u prezantuan edhe drejtuesit e rinj të disa prej departamenteve të Bankës së Shqipërisë, më konkretisht ai i Departamentit të Mbikëqyrjes, z. Deniz Deralla, i Departamentit të Administrimit, znj. Jonida Mero, i Departamentit të Teknologjisë së Informacionit, z. Indrit Xhemali, dhe Departamentit të Burimeve Njerëzore, Andi Bala.
Këto ndryshime janë kryer në kuadër të përmirësimeve organizative në Bankën e Shqipërisë, duke synuar rritjen e efektivitetit të këtyre departamenteve dhe përcjelljen e një fryme të re në përmbushjen e funksioneve kryesore të institucionit. Nëpërmjet këtyre ndryshimeve synohet një administrim dhe mbarëvajtje më e mirë e shërbimeve logjistike dhe burimeve njerëzore në Bankën e Shqipërisë.





Lajmet e fundit nga