Luli e Saliu bëjnë thirrje për mospagim dritash e anarshi

24 Nëntor 2014, 14:15, Politikë CNA

*Deklaratë për shtyp e Nënkryetarit të Grupit Parlamentar të Partisë Socialiste, Taulant Balla

Ne respektojmë çdo protestë dhe çdo qytetar në protestë. Po nuk mund të respektojmë protestuesin Lulzim Basha dhe as protestuesin Sali Berisha. I pari është bërë zëdhënësi i njerëzve që s?duan t?i paguajnë dritat po duan të vazhdojnë ti vjedhin. I dyti dihet, është përgjegjësi kryesor për të gjitha plagët e mëdha që ne po kurojmë me reformat tona. Ne nuk do ta rrisim çmimin e energjisë, Luli e Saliu gënjejnë për të mbledhur partinë e çoroditur nga 1 milionë shuplakat e 23 qershorit. Ne nuk i kemi rritur taksat, përkundrazi i kemi ulur për 95% të të punësuarve apo të vetëpunësuarve me anë të biznesit të vogël.

Luli e Saliu gënjejnë sepse e shohin që ekonomia, siç e konfirmon edhe FMN, ka nisur të rimëkëmbet. Ata nuk e duan rimëkëmbjen e ekonomisë, duan anarshi e turbullirë prandaj bëjnë thirrje për mospagim dritash e për shtet policor. Ne nuk po ndërtojmë një shtet policor, por po ndërtojmë shtetin që Luli e Saliu e kthyen në një repart bashibozukësh, duke nisur nga policia që ishte vendosur në prehrin e krimit.

Qeveria nuk ka lëvizur nga asnjë premtim. Legalizime falas? Patjetër! Deri më sot, pa u mbushur viti që kemi vënë në punë Agjencinë e Legalizimeve, është bërë më shumë se në tetë vjet bashkë. Po ç?janë këta që i kërkojnë hesap qeverisë për premtimet sapo është mbushur viti i parë, kur në tetë vjet shkatërruan, vranë, vodhën dhe e zhytën ekonominë në humnerën e borxheve?! Si mund të pretendosh që qeveria e re të rregullojë në 1 vit gjithçka që këta, Luli e Saliu, jo vetëm nuk rregulluan, por shkatërruan në 8 vjet.

Viti 2014 po mbyllet me rritje ekonomike 2,2%. Ndërkohë që Luli dhe Saliu ekonominë e zhyten në borxhe. Viti 2015 do jetë viti i parë që do të shënojë uljen e borxhit publik, akumuluar vit pas viti nga Luli dhe Saliu.

Nëse Luli dhe Saliu kërkojnë të nxisin anarshinë dhe turbullinë, nëse duan mosrespektimin e ligjit, është zgjedhja e tyre. Por kjo mazhorancë është e vendosur për të ndërtuar shtet, për të respektuar ligjin, pasi vetëm kështu mund të vazhdojnë reformat dhe rimëkëmbja e ekonomisë.