E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Kompania kineze i ofron avionin Edi Ramës, ja interesat e CEFC në Shqipëri

10 Shtator 2014, 11:59, Aktualitet CNA

Kryeministri Edi Rama udhëtoi drejt Kinës, duke shfrytëzuar avionin e një kompanie private kineze CEFC. Rama mbërriti në Pekin të martën në mëngjes, duke filluar vizitën e tij në Kinë. Ai dhe delegacioni që e shoqëron, u pritën në Aeroportin Ndërkombëtar të Pekinit nga Chen Guo You, zv-drejtor i Europës në Ministrisë e Jashtme. Ai pritet të drejtojë të mërkurën, sesionin interaktiv ?Suksesi i një Ekonomie të Re Krijuese? në Forumin Ekonomik Botëror që mbahet në Tianjin të Kinës Lindore. Rama është ftuar nga presidenti i Forumit Ekonomik të Davosit, Klaus Schvab.

Por krahas veshjes aspak zyrtare të kryeministrit, në momentin e mbërritjes në Aeroportin Ndërkombëtar të Pekinit ka rënë në sy edhe avioni çarter me të cilin udhëtoi delegacioni shqiptar. Bëhet fjalë për një avion modern, i prodhuar vetëm dy vite më parë, të llojit ?Gulfstream? (G550). Avioni zotërohet nga CEFC, Kompania e Energjisë së Kinës, e cila është një sipërmarrje private, së bashku me Fondin e Investimeve të Energjisë në Shangai dhe ?Zhong An United?, një tjetër fond investimesh. Interesat e këtij grupi privat shtrihen në fushën e energjisë dhe janë pikërisht ata që kanë sponsorizuar edhe udhëtimin e kryeministrit Rama drejt Pekinit. Avioni dymotorrësh, që transportoi Ramën drejt Pekinit, ka 20 vende dhe më parë ka qenë në pronësi të ?WELLS FARGO BANK?, në Qytetin Salt Lake të Shteteve të Bashkuara. Me një pavarësi fluturimi prej 12 orësh, avioni që mban edhe logon e CEFC, duket t?i ketë garantuar Ramës dhe ministrave të tij një udhëtim komod. Zbritja e Ramës në Pekin është dokumenttuar edhe nga fotot e korrespondentit të Radios së Jashtme të Kinës, në shqip, Fan Lupeng.

Nuk ka ende të dhëna zyrtare për mënyrën se si Edi Rama mori në përdorim këtë avion, por interesat ekonomike të CEFC në Shqipëri janë shumë të qarta. Janë të paktën dy vizita gjatë këtij viti të drejtuesve të CEFC në Tiranë, të shoqëruara nga dy takime me Edi Ramën dhe ministrat e tij. Fillimisht në janar 2014, drejtori ekzekutiv i CEFC për Kinën, Zang Jianjun dhe drejtues të tjerë të kompanisë kanë trokitur në zyrën e Edi Ramës. Në qendër të bisedës ka qenë vendosja e një bashkëpunimi afatgjatë për projektet e energjisë, si dhe ajo që është cilësuar si një aleancë strategjike në fushat e industrisë, financës, infrastrukturës dhe investimeve. Në mënyrë specifike, investitorët kinezë janë takuar me ekspertë të kompanisë shqiptare të naftës, të cilëve ju kanë bërë një pyetësor me33 kërkesa, duke nisur nga rezervat e naftës e gazit dhe deri të problemet e taksimit apo modelin e kontratave.

Një delegacion tjetër i CEFC ka mbërritur në Shqipëri në mars të këtij viti, këtë herë i udhëhequr nga Chan Chauto, president i kompanisë. Ftesa për këtë vizitë mësohet se ka qenë e qeverisë shqiptare. Sërish në zyrën e Edi Ramës është diskutuar për projektet e bashkëpunimit dhe kinezët kanë qenë të qartë se synimi i tyre nuk është të arrijnë marrëveshje të thjeshta biznesi, por një bashkëpunim strategjik afatgjatë.

Në këtë mënyrë, interesat e biznesit të kompanisë kineze CEFC në Shqipëri janë fare të qarta dhe për më tepër ato synojnë sektorë strategjikë dhe marrëveshje afatgjata. Mbetet të saktësohet roli i kryeministrit Edi Rama në këtë histori biznesi, por duket se ai tashmë e ka pranuar dhuratën e parë. Një udhëtim i paguar nga një kompani private, me interesa direkte në vendin tonë, është sigurisht një pikëpyetje jo e vogël për marrëdhëniet e kryeministrit të vendit me botën e biznesit.