E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Lazarati i Veriut dhe heshtja e politikës

26 Gusht 2014, 18:56, Aktualitet CNA

Nga Mero Baze

Një helikopter i forcave të policisë shqiptare i ka shpëtuar rrëzimit tragjik pasi disa persona të armatosur kanë hapur zjarr kundër tij në zonën e Dukagjinit. Sulmi që pasoi një tjetër goditje ndaj helikopterit tjetër të ushtrisë, që ishin bashkërisht në aksion, tregon për një betejë të organizuar kundër Policisë së Shtetit nga grupe kriminale të inkurajuara t?i rezistojnë policisë.

Për fat të mirë ende nuk kemi viktima. Njësoj si në Lazarat, policia po operon me kujdes duke ndarë popullsinë nga kriminelët, por sulmi ndaj saj, në këtë rast është shumë më i rrezikshëm se ai në Lazarat.

Ndërsa Lazarati u bë i njohur ndërkombëtarisht dhe pati shumë jehonë në vend, pasi ishte kthyer në një territor jashtë kontrolli, që shërbente mes të tjerash dhe si strehë për personat në kërkim, Dukagjini duket se është një Lazarat i pashkelur dhe i pashpallur deri më sot, me elementë kriminalë më të rrezikshëm se Lazarati.

Por ndërsa ndërhyrja në Lazarat u shoqërua me një debat të fortë politik, ku Sali Berisha u doli zot banditëve me një trimëri për t?u admiruar si i papërgjegjshëm, ndërhyrja në veri po shoqërohet me një heshtje të frikshme të politikës, a thua se aty nuk po ndodh asgjë. Në Lazarat shkuan deputetët të Komisionit të Sigurisë nga parlamenti, pati polemika publike, pati mbështetje të hapur nga Berisha për banditët dhe qëndrim të rezervuar të Lulzim Bashës, pra pati shumë ngjyra.

Në Shkodër depuetetët socialistë dhe ata të Partisë Demokratike po heshtin. Bile po hesht dhe Sali Berisha, i cili duket se është zënë në befasi nga ky sulm i policisë në bastionet e tij në veri.

Beteja e policisë me banditët në veri, po shkon përtej asaj çfarë ndodhi në Lazarat. Kemi dy helikopterë të qëlluar, që mund të kishin pasoja tragjike, dhe një betejë njëjavore të forcave speciale mes maleve, që po qëllohen përditë nga banditë. Deputetët socialistë të Shkodrës duhet ta thonë së paku një fjalë për këtë që ndodh. Saimir Tahiri nuk është person fizik, që mund ta ketë inat një deputet apo qejf dikush tjetër, por Ministër i Qeverisë Socialiste dhe në konflikte të tilla të policisë me krimin, deputetët duhet të zgjedhin me kë janë. Për hir të pasionit të saj antidrogë duhet të flasë dhe Jozefina Topalli. Ajo mbeti duke numëruar gomonet me drogë që dalin jashtë Shqipërisë, nga prodhimi i bollshëm i kohës kur ajo ishte në pushtet dhe nuk ka thënë gjysmë fjale, për atë që po ndodh tek shtëpia e saj, tek Qarku që ajo udhëheq listën e deputetëve të PD.

Heshtja e politikës ndaj betejës në veri është një sinjal i keq që i çohet policisë dhe një inkurajim për banditët e armatosur. Ata që qëllojnë mbi policinë dhe helikopterët e saj duhet të ndjehen të pasigurt dhe të pambështetur. Saimir Tahiri është një politikan, ndaj të cilit mund të marrësh hak në parlament nëse e ke problem, por nuk mund të zgjedhësh betejën e tij me banditët për t?i qëndruar pas shpine.

Nuk pres të flasë Presidenti, se ai nuk flet dot pa leje të Berishës. Nuk pres as ndonjë gjë racionale nga Sali Berisha, por deputetët e Qarkut të Shkodrës, socialistë dhe demokratë, duhet të dëshmojnë vullnetin politik kundër krimit. Nuk jam kundër që dikush të ketë rezerva dhe për policinë, por ta thotë. Heshtja është aleate e artë e atyre që po i rezistojnë shtetit.