“Lady al Qaeda” kerkohej nga ISIS si shkëmbim me gazetarin e ekzekutuar, James Foley

22 Gusht 2014, 15:36, Kosova & Bota CNA

Një terroriste e shkolluar në të famshmin MIT për neuroshkencë, e njohur edhe si ?Lady al Qaeda?, ishte në listën e ISIS për shkëmbim me gazetarin e ekzekutuar, James Foley.

Nëna e tre fëmijëve, Aafia Siddiqui është aktualisht në burg në Teksas, ku vuan dënimin prej 86 vitesh.

Ajo u arrestua pasi dyshohej se kishte në plan të kryente sulme terroriste në SHBA.

Atëherë u raportua se qëllimi i saj ishte infektimi masiv i njerëzve me Ebola.

Por administrata e presidentit Barack Obama refuzoi që të merrte në konsideratë një ofertë të tillë dhe as atë për dhënien e 132 milionë dollarëve në shkëmbim të lirimit të Foley.

E lindur në Karachi, Siddiqui, 42 vjeç, ndoqi dy universitete në New England.

Ajo mori doktoraturën në Brandeis dhe më pas u trajnua për neuro- shkencë në Massauchusetts Institute of Technology.

Ajo themeloi Institutin për Kërkime dhe Mësime Islamike gjatë kohës që jetonte në SHBA.

Nëna e tre fëmijëve u fut në listën e më të kërkuarve të FBI pasi Khalid Sheikh Mohammed- mendja pas 11 Shtatorit, e përmendi atë gjatë një marrje në pyetje në vitin 2003.

Ajo u arrestua në Afganistan në vitin 2008.

Kur u arrestua, iu gjetën plane të detajuara se si të vriste duke përhapur Ebolën, se si të krijonte një bombë të ?pistë? dhe madje edhe se si të mësonte fëmijët që të vrisnin të rriturit.

Po ashtu ajo kishte me vete edhe një lëndë shumë toksike në çantë dhe dokumente me plane të detajuara për sulme në Wall Street, Empire State Building, Statujën e Lirisë, etj.

Mes shënjestrave ishte edhe një qendër e përdorur për testime të armëve biologjike gjatë Luftës së Ftohtë.

Gjatë marrjes në pyetje ditën e arrestimit, ajo rrëmbeu një armë që ishte mbi tavolinë dhe nisi të qëllonte mbi hetuesit. Nuk i goditi dot, por u qëllua në stomak kur hetuesit kthyen zjarrin.

Një autore, Deborah Scroggins, thotë se ajo është një figurë simbol për xhihadistët në mbarë botën.

Ajo thotë se nuk e habit fakti që ISIS ka kërkuar lirimin e saj në këmbim të gazetarit Foley.

Siddiqui u soll në SHBA dhe u akuzua për tentativë vrasje, për sulm me armë vdekjeprurëse dhe tre akuza të tjera për sulm.

Gjyqi i saj zgjati për 14 ditë në fillim të vitit 2010.

Gjatë gjyqit, avokatët e saj thanë se ajo ka probleme mendore, por ajo vetë nuk e pranoi.