web counter
LEXO PA REKLAMA!

SHKARKO APP

App Store
Google Play

E fundit!

x

Shpresat e liberianëve tek ilaçi pa leje përdorimi

18 Gusht 2014, 07:16, Kosova & Bota CNA

Virusi vdekjeprurës

Më shumë se 300 vetë janë sëmurë tashmë nga ebola në Liberi. Të gjitha masat, si izolimi i të sëmurëve, apo mbyllja e kufinjve, nuk kanë mundur të pengojnë përhapjen e virusit në Afrikën Perëndimore. Tani shpresat e liberianëve varen te një eksperiment. Fillimisht shteti do të kurojë me medikamentin amerikan të patestuar sa duhet ZMAPP dy mjekë të infektuar me virusin e sëmundjes.

Rreziku i madh nga infektimet

Autoriteti amerikan për mjetet farmaceutike lejoi të martën (12.08.2014) eksportimin e këtij ilaçi deri tani të paautorizuar. Dy amerikanë të sëmurë me ebola i janë nënshtruar në SHBA me sukses këtij trajtimi. Gjendja e tyre është përmirësuar që atëherë. Për ministrin e Informacionit të Liberisë Lewis Brown vendimi i autoritetit amerikan është një shkak për t’u gëzuar dhe fillimi i një aplikimi më të gjërë të medikamentit. “Të gjithë të infektuarit duhet të kenë shansin, t’i nënshtrohen trajtimit me këtë ilaç, nëse kanë dëshirë”, tha Brown.

Në një sondazh të DW liberianët kanë përshendetur iniciativën e qeverisë. “Është me të vërtetë një lajm i mirë, që ilaçi është rrugës për në Liberi”, tha një e pyetur. Kjo mund të çonte në uljen e numrit të rasteve të vdekjeve. “Ne mezi presim, që të gjejmë një ilaç kundër sëmundjes”, tha një tjetër liberian, edhe pse ZMAPP deri tani nuk është i lejuar në trajtimin e njerëzve.

Synimi arsyeton mjetin

Pyetja, nëse ilaçi mund të lejohet tek njerëzit, ka shkatuar diskutime të ndryshme. Kështu organizata e ndihmës Mjekë Pa Kufij (MSF) porositi që përdorimi i këtyre mjeteve duhet të mbetet një përjashtim dhe kërkoi mbikqyrje të kujdesshme të pacientëve. Të martën u bë e ditur, se një misionar spanjoll, i cili sipas njoftimeve të tij të pakonfirmuara pas sëmurjes me ebola është trajtuar me ZMAPP, ka vdekur nga infeksioni.

Megjithë rezervat, në Liberinë e prekur nga Ebola mbizotëron fryma e pranimit të ilaçit eksperimental. “Çdo ilaç ka efekte anësore madje edhe ato, që janë miratohen nga agjenci të ndryshme rregullatore”, tha mjeku liberian, ish-ministër i Shëndetësisë, Peter Coleman, për DW. Sigurisht që pacientët do të jenë nën vëzhgim. “Por a kemi zgjidhje tjetër? Nëse nuk u japim ilaçe, këta njerëz do të vdesin!”

Të martën, pas vendimit të autoriteteve të SHBA edhe Organizata Botërore e Shëndetësisë u bashkua me argumentin se situata në Afrikën Perëndimore e justifikon hapin e pazakontë. Organizata nuk ka zgjidhje tjetër, tha mjeku Halidou Tinto nga vendi fqinj i Liberisë, Burkina Faso për Deutsche Wellen: Nuk mund të injorohet asnjë mjet, për të frenuar epideminë. “Testet e tilla janë të lejuara, kur vdekshmëria është e lartë”, tha Tinto, i cili është i specializuar në kryerjen e hulumtimeve klinike. Në rastin e ebolës vdekshmëria e të infektuarve është mbi pesëdhjetë për qind.

Kundër hezitimit

Gazetari Amadou Tham Camara mendon se medikamenti i ri duhej të kishte ardhur shumë më heret në Afrikë. Vendlindja e Camaras Guinea vjen e dyta pas Sierra Leones me numrin e viktimave nga ebola. “Indinjohuni, që mjafton që dy amerikanë të sëmuren, për t’u gjendur mjeti kundër ebolës”, i shkruante Camara bashkëkombasve të tij , “Zemërohuni, që mijëra afrikanë kanë vdekur, megjithëse ekziston një ilaç!” Të martën Camara në bisedë me DW shprehu kënaqësinë , që Liberia tani lejohet të testojë ZMAPP. Në Guinea shpresojnë se edhe të sëmurët e atjeshëm do të përfitojnë si rrjedhojë e kësaj.

Edhe përdoruesit DW Facebook në Afrikë reaguan ndaj vendimit të Liberisë për të përdorur një ilaç të paprovuar. Kështu keniani Aggrey Kaguo, shkruante se përpjekja vjen shumë vonë, sepse sëmundja tashmë ështe bërë një problem i madh. Rezerva nga ana tjetër shpreh Amoc Jay Michael Irondo nga Tanzania: “Ky medikament provë së pari duhet të testohet në mënyrë të mjaftueshme, para se të eksportohet në Afrikë dhe ndoshta ai sjell atje probleme të reja.” DW





Lajmet e fundit nga