E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

Drejtuesit e BSH-së, 2.6 milion dollarë shpërblime në vit

9 Gusht 2014, 18:45, Aktualitet CNA

Të jesh anëtar i bordit të Bankës së Shqipërisë nuk mund të rrish i kënaqur vetëm me pagën mujore prej 4 milion lekësh të vjetra që merr në bankë, e cila ne fakt ia kalon edhe asaj të presidentit të Republikës.

Përveç pagës, këta anëtarë dhe drejtuesit e bankës kanë marrë në 2013-ën plot 2.6 milion dollarë si shpërblime.

Këshilli Mbikëqyrës ka edhe privilegje të tjera të cilat ia njeh ligji për Bankën e Shqipërisë dhe që sigurisht nuk ka harruar t?i shfrytëzojë.

Vetëm gjatë vitit të shkuar, anëtarët e Këshillit dhe drejtues të bankës kanë përfituar 140 milionë lekë për të marrë kredi me interes 0.5% për 30 vjet, interes më i ulët edhe se inflacioni, raporton Vizion Plus.

Këto kredi janë marrë në kulmin e krizës, kur Ministria e Financave u detyrua të rrisë borxhin publik që të paguante muajt e fundit pagat në administratë.

E thënë ndryshe, mesatarisht secilit anëtar i takon të ketë marrë 200 mijë dollarë.

Por, nuk mjafton me kaq!

Në 2013-ën, 5 milion lekë, ose 50 mijë dollarë kanë shkuar si shpenzime telefoni për anëtarët e bordit, ndërsa për paga dhe bonuse janë dhënë 1.2 milion dollarë, ose 120 milion lekë të rinj.

Bordi mbikëqyrës i Bankës së Shqipërisë ka privilegjet më të larta se shumë poste të tjera publike.

Si një institucion i pavarur, ai duhet të ketë staf te aftë teknik qe gëzon të drejta të tilla.

Por, deri më sot në vendimmarrjen e bankës kemi parë të mos kenë suksese te spikatura shumë prej politikave të ndërmarra, që nga norma e ulët e inflacionit, bllokimi i kredive dhe deri te vjedhja e mbi 7 milionë dollarëve ne thesar.

Dhe ky skandal ende nuk dihet nëse erdhi për shkak të moszbatimit të rregullave, apo nga mungesa e vendimeve që duhet të kishte marrë bordi.

Për dy vite resht, Kontrolli i Lartë i Shtetit ka rekomanduar ndryshimin e ligjit për Bankën e Shqipërisë. Sipas KLSH-së, ky ligj ka konflikt interesi në lidhjen mes Guvernatorit dhe anëtarëve të bordit.

Specifikisht neni 45 i ligjit për bankën thotë se: Këshilli Mbikëqyrës vendos për shpërblimin e anëtarëve në këtë këshill, duke përfshirë këtu pagën, shpërblimet suplementare madje dhe kompensimet monetare për kalimin e kohës së lirë si dhe masën e kredive për banesë.

Por, deri më sot, jo vetëm Banka Qendrore por asnjë prej parlamentarëve nuk ka marrë nismën për të ndryshuar këtë ligj.