Osman Stafa, kreu i PD ne Durres

13 Korrik 2014, 18:29, Politikë CNA

Osman Stafa është zgjedhur kryetar i Partisë Demokratike në Durrës, përballë Adi Mukës, një biznesmen transporti i supermbështetur nga strukturat drejtuese të Partisë Demokratike në qendër.

Për gati dy javë, procesi ishte futur në krizë, për shkak të diktimit të procesit nga te deleguarit, të cilët synonin nxjerrjen e Mukës kryetar të PD në Durrës. Për këtë disa kandidatë dhanë dorëheqje dhe dega e Durrësit doli jashtë loje.

Pas raundit të parë në balotazh doli Osman Stafa, një anëtar i vjetër i PD në Durrës, ish punonjës i policisë tatimore, dhe Ardi Muka, një biznesmen që është marrë me transport mallrash, por që nuk ka qenë pjesë e strukturave të PD më parë.

Gara u bë me e fortë për shkak se dega e PD në Durrës, u nda keq një vit më parë, mes Olldashit dhe Bashës, dhe u desh ndërhyrja e Berishës nga qendra, të ribëheshin lista të reja dhe të ngushtohej rezultati në favor të Bashës.

Gjithë ish zyrtarët e pushtetit të Partisë Demokratike në Durrës , dhe deputetët e asaj zone u rreshtaun me Bashën. Kjo ndarje u ruajt dhe në këto zgjedhje.

Muka ishte i supermbështetur nga Oerd Bylykbashi, Eduard Halimi, Arqile Goreja, Sabah Jemishta, Ferdinand Xhaferi, etj. Fituesi përballë tij ka një profil të ulët politik, por është militant i vjetër i PD. Ai më shumë se sa mbështetje emrash ka pasur në favor alergjinë që ngjallin në PD e Durrësit ish pushtetarët e PD, që deshën të diktojnë garën. Në një farë mënyre ajo lojë e pistë që Basha dhe Berisha bën ndaj Olldashit një vit më parë, ju kthye në bumerang në zgjedhjet brenda tyre.

Kush eshte Osman Stafa

-Ka mbaruar studimet e larta Ekonomi-Financë 1987-1991

-Lider i lëvizjes studentore dhjetor 1990

-Firmëtar në themelimin e PD

-Kryetar i grupit të grevës në takim me ish kryeministrin Adil Çarçani

-Për tërë kontributin e dhënë është dekoruar me medaljen e Trimërisë

-1992-1994 Kryetar i policisë financiare Durrës-Krujë

-1994-1997 ka punuar me detyrën e shefit të komisiariatit Përmet, Berat, Lushnje.

-Në vitin 2000 ideator dhe financues i bustit të Azem hajdarit

-1997-2007 sektori privat

-2007-2013 Punon në administratën tatimore Tiranë

– nga shkurti 2013 i papunë (sektori privat)