E fundit!

12:39 Aktualitet

“Vrasja e efektivit duhet të hetohet”/ Berisha akuza Hitës: Në vend të dorëheqjes kërkon të mbrojë karrigen e tij

Kreu i PD-së Sali Berisha ka kërkuar hetim të thelluar në ...

Debate tek Komisioni i Sigurisë, Luan Rama: P/ligji mbi SHKB, ngjan me modelin e Sigurimit

7 Korrik 2014, 18:23, Politikë CNA

Komisioni i Sigurisë është përfshirë nga debatet në lidhje me p/ligjin e propozuar për Shërbimin e Kontrollit të Brendshëm në Ministrinë e Brendshme, strukturë e cila do të emërtohet Shërbimi për Ankesat dhe Çështjet e Brendshme. Kundërshtitë për draftin e paraqitur kanë ardhur nga deputetët e LSI, që kanë shprehur rezerva për disa nga nenet e draftit.

Deputeti Luan Rama ka ngritur shqetësimin se disa nene të draftit i japin Ministrit të Brendshëm më shumë kompetenca sesa i takojnë, madje Rama ka shkuar edhe më tej kur ka thënë se ky model i ofruar ngjason me atë të Sigurimit të Shtetit gjatë viteve të diktaturës.

Një tjetër nen që ka shkaktuar debate në komision ishte ai mbi informacionet që kishte të drejtë ministri i Brendshëm të informohej në lidhje me burimet e informacionit. Në këtë kuadër, komisioni ka vendosur zhvillimin e diskutimeve në mbledhjen e ardhshme, për shkak të mosdakordësisë mbi këtë nen të p/ligjit.

Po kështu, Komisioni ka rrëzuar amendamentin e Komisionit parlamentar të Ligjeve që kishte propozuar që të drejtën e miratimit të strukturës ta kishte Kryeministri, ndërkohë që tashmë me ndryshimet e miratuara në Komisionin e Sigurisë këtë të drejtë e ka ministri i Brendshëm.

Sipas draftit, ky ligj ka si qëllim të përcaktojë misionin, organizimin, funksionimin, rregullimin e pozitës juridike të Shërbimit për Ankesat dhe Çështjet e Brendshme, si dhe karrierën, detyrat, të drejtat e përgjegjësitë e punonjësit të këtij shërbimi. Shërbimi për Ankesat dhe Çështjet e Brendshme e ushtron veprimtarinë e tij ndaj strukturave të Policisë së Shtetit, strukturës përgjegjëse për ruajtjen e personaliteteve të larta shtetërore dhe të objekteve të rëndësisë së veçantë dhe strukturës së Mbrojtjes nga Zjarri dhe për Shpëtimin. Misioni i Shërbimit është garantimi i zbatimit të ligjit dhe interesave të publikut, mbrojtja nga veprimtaria e mundshme kriminale dhe e kundërligjshme e kryer nga punonjës të veçantë të strukturave pavarësisht nga funksioni dhe grada.

Në nenin 5 përcaktohet veprimtaria e Shërbimit ku përfshihet: parandalimi, zbulimi dhe hetimi i veprave penale si dhe i shkeljeve të ligjit të kryera nga punonjësit e strukturave gjatë ushtrimit të detyrës dhe për shkak të saj, pranimi, administrimi dhe zgjidhja e ankesave ndaj punonjësve të strukturave për mospërmbushje të detyrës sipas standardeve të miratuara me akte normative, për vepra penale dhe shkelje të tjera të ligjit.

Gjithashtu përfshihen inspektimi për verifikimin e respektimit të ligjshmërisë, në përputhje me legjislacionin dhe standardet e miratuara me akte normative, ruajtja e integritetit të punonjësve të strukturave, kontrolli i pasurisë së pajustifikuar të personave, objekt hetimi, për goditjen e veprimtarisë korruptive dhe kriminale dhe analiza, studime dhe rekomandime të përgjithësuara në bazë të inspektimeve dhe hetimeve për aspekte të rëndësishme të organizimit e të funksionimit të strukturave dhe pritshmërisë së publikut në drejtim të sigurisë publike. Në draftin e miratuar në mbledhjen e Qeverisë parashikohet që kjo strukturë funksionon e pavarur nga strukturat, në përputhje me ligjet, duke respektuar të drejtat dhe liritë themelore të njeriut, vepron pa diskriminim, duke respektuar asnjanësinë politike, ruatjen e informacionit të klasifikuar dhe në mënyrë transparente.