Korçë, PS tenton të rrëmbejë Qarkun

15 Maj 2014, 11:08, Politikë CNA

PS e Korçës po përpiqet të bëjë të mundur përmbysjen e numrave në Këshillin e Qarkut, marrjen e drejtimit të këtij institucioni. Burime zyrtare thanë për City FM, se 30 këshilltarë të Partisë Socialiste, LSI dhe të partive të mazhorancës, në bazë të ligjit kanë bërë kërkesën për mbledhje ditën e premte, në orën 10:00. Njoftimi ka ardhur çuditërisht nga dy institucione, Qarku dhe Prefektura, i pari njofton mbledhje, i dyti jep vendimin, ?shkarkojmë kryetarin aktual të qarkut, emërojmë kryetarin e ri? deklaroi zëdhënësja e Prefektit të Korçës.

Në fakt numrat e përfaqësuesve ia bëjnë të pamundur mazhorancës qeverisëse, përmbysjen e drejtimit të Qarkut Korçë dhe për rrjedhojë tentativën për të marrë nën kontroll administratën e këtij institucioni.

Dy javë më parë Këshilli Bashkiak, me mazhorancë nga PS ndërroi përfaqësuesit e saj në Këshillin e Qarkut. Emri i Irena Nikajt, është ai i kandidatit që ky subjekt politik ka zgjedhur si përfaqësues të saj në rast se do të përmbysë diferencën e votave.

Jo vetëm Nikaj, por një angazhim për të bërë rrëmbimin e Qarkut të Korçs, është angazhuar në mënyrë të drejtpërdrejtë, Prefekti Ardit Konomi, i cili megjithëse në moshë të re, njihet për eksperiencën e tij si gjahtar. Mesa duket moratorium i gjahut e ka çuar Prefektin e Korçës, nga sportiviteti me çifte në dorë maleve, në gjahtarin e votave, duke bërë pazare për të siguruar fitoren e partisë së tij në Qarkun e Korçës.

Mësohet se drejtuesit e Partisë Socialiste, e kërkojnë me çdo kusht këtë institucion, për të bërë të mundur punësimin në administratë të militantëve të tyre, të cilët duken të pakënaqur ,pasi ende shumë prej tyre janë të papunë dhe ndihen të zhgënjyer nga Qeveria e Rilindjes.

Këshilli i Qarkut Korçë, me 71 përfaqësues, nga të cilët 38 janë të PD-së dhe aleatëve të saj dhe 33 të PS-së dhe aleatëve të saj. Prej disa kohësh PS, ka tentuar përmbysjen e përfaqësuesve të Këshillit, në disa prej njësive vendore të Qarkut, për të krijuar më pas shumicën e domosdoshme të votave në Këshill. Institucioni i Qarkut të Korçës, prej gati 8 vjetësh drejtohet nga PD dhe aleatët e saj.