E fundit!

22:05 Politikë

“Filloi numërimi mbrapsht, kapitujt mbyllen brenda 2027-ës”/ Rama ndan videon nga Brukseli

Kryeministri Edi Rama ka ndarë një video nga Brukseli ku s...

Votimi absurd i Elon Musk-ut

20 Dhjetor 2022, 08:28, Tech CNA

Foto ilustruese

Që kur egomaniaku bleu "Twitter"-in, aty po mbretëron kaos absolut. Tani Elon Musk organizoi një votim për veten. Por kjo është farsë, mendon Martin Muno.

Thuajse 58 për qind e të gjithë 17.5 milionë votuesve ju përgjigjën me "Po" pyetjes së Elon Musk-ut në "Twitter" nëse ai duhet të largohet nga posti i shefit të "Twitter"-it. Çfarë do të thotë kjo?

Përgjigjja e shkurtër është: asgjë. Përgjigjja e gjatë është: Musk-u duket se ngadalë po e humbet interesin për lodrën e tij të re të preferuar, të cilën e bleu për 44 miliardë dollarë. Sepse që nga blerja e "Twitter"-it ai ka pasur veç telashe. Por keqardhja për njeriun e dytë më të pasur në botë është e pavend. Sepse Musk-u është vetë fajtor për këtë gjendje të mjeruar, sepse sillet si një fëmijë katërvjeçar, kokëfortë.

"Twitter" - platformë globale komunikimi

"Twitter" nuk është ndonjë prodhim luksoz, "Twitter" është një nga platformat më të rëndësishme të komunikimit botëror - nëse jo më e rëndësishmja. Politikanë dhe menaxherë kryesorë, qeveri dhe OJQ, gazetarë dhe shkencëtarë, yje dhe njerëz të zakonshëm e përdorin në mbarë botën shërbimin falas për të shpërndarë informacione, për t'u informuar ose për të shkëmbyer ide.

Dhe edhe nëse në 'Twitter" ka pasur gjithmonë probleme me gjuhën e urrejtjes sistemi ka funksionuar mjaft mirë për vite me radhë; ndër të tjera sepse shumë përdorues në raste të tilla janë sanksionuar. Shembulli më i spikatur ishte ish-Presidenti Donald Trump, llogaria e të cilit u pezullua pasi ai e përdori "Twitter"-in për të bërë thirrje për sulmin në Kapitol.

Kaos dhe teori konsipirative

Kur "Twitter"-in e bleu Elon Musk-u, shpërtheu kaosi. Fillimisht ai pushoi gjysmën e gjithë punonjësve, vetëm për t'i bindur pak më vonë shumë prej tyre që të riktheheshin (një përpjekje kjo kryesisht pa sukses). Po ashtu kushdo që guxonte të kritikonte shefin e ri të madh, pushohej nga puna. Madje, Musk-u akuzoi dhe ish-shefin e sigurimit të "Twitter"-it se kishte simpati për pedofilët, duke shkaktuar një sërë kërcënimesh me vdekje. Sigurisht që nuk kishte asnjë bazë faktike për pretendimin në stilin e teorive konspirative. Musk-u e tregoi veten si një mbështetës i miteve të djathta të konspiracionit edhe në postime të tjera në "Twitter".

Ai tregoi se çfarë mendon realisht për lirinë e shprehjes kur, brenda pak ditësh, riautorizoi qindra llogari të bllokuara ekstremiste të krahut të djathtë, ndërsa në të njëjtën kohë bllokoi gazetarët që guxuan të postonin lëvizjet e tij të fluturimit – tashmë të aksesueshme nga publiku.

Para të hedhura kot

Si rezultat i sjelljes së tërbuar të Musk-ut qindra partnerë i tërhoqën reklamat e tyre nga "Twitter"-i. Musk-u është drejtor ekzekutiv edhe i prodhuesit të automobilëve Tesla, dhe imazhi negativ që ai krijoi pas blerjes së "Twitter"-it pati ndikim negativ edhe në tregun e aksioneve të Teslas. Çmimi i aksioneve të Tesla-s është përgjysmuar që nga fillimi i vitit. Dhe pasuria personale e Musk-ut ka rënë me rreth 100 miliardë dollarë. Mundësia më e madhe për të ardhmen e "Twitter"-it është që Musk-u të emërojë një bedel t'ju përkushtuar përsëri gjatë muajve të ardhshëm detyrimeve si sipërmarrës i Tesla-s dhe i kompanisë së tij për ushëtime kozmike SpaceX. Nga ana tjetër, kushdo që mendon se Musk-u do t'i thërrasë arsyes dhe do ta bëjë "Twitter"-in sërish platformën që ishte dikur, ai beson edhe se plaku i Vitit të Ri ekziston me të vërtetë./ DW