E fundit!

10:46 Aktualitet

Skenarët e Erion Veliajt në protestën për Zvërnecin

Një protestë që parullën ka “Zvërnec”, por po t’i heqësh e...

ZYRTARE/ Arritje historike, Europiani U-17 do të zhvillohet në Shqipëri

26 Shtator 2023, 15:18, Sport CNA

Komiteti Ekzekutiv i UEFA-s ka miratuar sot një tjetër vendim të rëndësishëm për futbollin shqiptar. Zyra për shtyp e FSHF-së ka bërë të ditur se në mbledhjen e sotme është miratuar kandidatura e vendit tonë për të organizuar fazën finale të Kampionatit Europian për U-17 në vitin 2025.

Aktiviteti në fjalë zhvillohet me 16 skuadra dhe padyshim që ndeshjet do të luhen në qytete të ndryshme të vendit duke pasur parasysh numrin e madh të sfidave. Gjithashtu, kjo nënkupton që vetë Shqipëria si vend organizator, ka një biletë të siguruar për fazën finale të turneut, një risi për kombëtaren e kësaj grupmoshe e cila nuk ka kaluar asnjëherë më parë fazën e Elite Round.

NJOFTIMI I FSHF-së:

Federata Shqiptare e Futbollit ka arritur një tjetër sukses historik, duke sjellë për herë të parë në Shqipëri finalet e një turneu madhor ndërkombëtar për moshat. UEFA ka vendosur t’i besojë FSHF-së dhe Shqipërisë mikpritjen e finaleve të Kampionatit Europian 2025 për grupmoshën U-17.

Federata Shqiptare ishte një nga federatat që kishte kandiduar për të pritur fazën finale të turneut, duke përgatitur një aplikim voluminoz që u përgatit nga administrata e FSHF-së dhe që më pas u paraqit në UEFA.

Së fundmi, Komiteti Ekzekutiv i UEFA-s në mbledhjen e zhvillua këtë të martë në Qipro ka votuar pro kandidaturës shqiptare, me finalet e turneut kontinental që do të luhen në Shqipëri pas dy vitesh.

Investimet në infrastrukturë me stadiumet e reja, që plotësojnë kriteret e duhura për turne ndërkombëtarë, apo edhe eksperienca e pasur e administratës së FSHF-së në mikpritjen dhe organizimin e turneve ndërkombëtarë ka bindur sërish UEFA-n të sjellë në vendin tonë një ngjarje madhore.

Në vendin tonë, majin e vitit 2022, u organizua finalja e parë e Conference League, AS Roma – Feynoord, një ngjarje historike për Shqipërinë dhe futbollin shqiptar. Tani është momenti për një tjetër event të rëndësishëm, që do të sjellë Kombëtaret më të forta të Kontinentit për të luftuar për trofeun e titullit kampion Europe.