E fundit!

15:57 Aktualitet

VIDEO-Vrasja në Maliq, Lamallari “zbarkon” në Policinë e Korçës

Ministri i Brendshëm Besfort Lamallari ka zbarkuar në Drej...

Kritika edhe në mbledhje, zbardhet fjalimi i Shehit te Tirana

26 Shtator 2023, 12:25, Sport CNA

Tirana është tronditur të premten në sfidën me Erzenin. Një humbje si një rrufe në qiell të hapur ka përzier shumë situatën te bardheblutë. Pas ndeshjes, Orges Shehi dhe stafi i tij, përfshirë drejtorin Tefik Osmani dhe kapitenin Ilion Lika, kanë qëndruar gjatë duke diskutuar për atë që ndodhi në fushën e lojës. Nga të gjithë është dhënë mendimi për këtë sfidë.

Diskutimi është spostuar në “Skënder Halili” ditën e shtunë. Ka qenë trajneri Orges Shehi që ka përsëritur fjalët që ka thënë edhe në media. Sipas tij, askush nuk mund të mbivlerësojë veten dhe secili duhet ta tregojë veten në fushën e lojës. Shehi u shpreh çdo lojtar duhet të djersitë për të qenë titullar.

“Të gjithë duhet të reflektojmë. Të mos mendojmë se gjërat i kemi të sigurta, pasi është “play off”-i. Kështu nuk mund të mendojmë. Secili duhet të japë më të mirën. Formacioni fitohet dhe nuk dhurohet. Të gjithë e kanë shansin t’ia dalin të më mbushin mendjen. Nuk dua që asnjë të luajë individualisht, por për skuadrën. Jemi Tirana dhe duhet të tregojmë se cilët jemi në fushë. Nuk do të toleroj askënd. Shoh që në stërvitje jepni, por në fushë luani më shumë për vete. Erzeni nuk duhet të përsëritet”, ka thënë Shehi.

Nga ana tjetër, fjalët e Shehit kanë qenë pak a shumë të njëjta edhe pas sfidës me Teutën, ku sërish durrsaku ka qenë shumë i ashpër me skuadrën. Sipas tij, te Tirana duhet të tregosh veten.

“Këtu nuk ka shaka. Të gjithë keni ardhur për të dhënë më të mirën, por kujdes te përqendrimi. Nuk dua të përsëris se çfarë ka ndodhur, por këtu më parë janë djegur lojtarë si Limaj e Kallaku”, mësohet të ketë thënë Shehi më parë.

Shtyrja e derbit me Partizanin ka qetësuar disi ambientin, por duhet të shohim se çfarë do të ndodhë. Laçi është sfida ku duhet të zgjohen të gjithë për të treguar se Erzeni apo Teuta ishte rastësi. Duket se “Final Four” realisht ka përzier kartat.