Vazhdon mrekullia e Erzenit, goli në minutën e fundit shtesë ndaj Laçit i jep kreun e Superiores

17 Shtator 2022, 19:50, Sport CNA

Një gol i shënuar nga Amir nga pika e bardhë në minutën e fundit të shtesës, i ka dhuruar fitoren Erzenit në sfidën kundër Laçit.

Ka qenë një sfidë e dominuar nga shijakasit, veçanërisht pjesa e dytë, që pas këtij suksesi ngjiten përkohësisht në krye të renditjes së Superiores.

Djemtë e Kapllanit vazhdojnë që të ruajnë të paprekur portën, pasi nuk kanë pësuar asnjë gol në këto 5 javë kampionat.

Erzeni-Laçi 1-0 (Amir 90+5′)

90+8’ Penallti për Erzenin. Nonato pengohet në zonë nga Dajsinani dhe për gjyqtarin nuk ka dyshime: 11-metërsh. Nga pika e bardhë godet Amir që zhbllokon këtë sfidë.

90+5’ Provon Shkurtaj me kokë, por topi i tij përfundon mbi traversë.

90’ Akordohen 5 minuta shtesë.

90’ Dominon dukshëm Erzeni, por shijakasit nuk arrijnë që të konkretizojnë rastet e shumta që krijojnë.

87’ Është radha e Kadriut që tenton sërish nga distanca, por pa gjetur kuadratin.

85’ Dominon Erzeni. Provon edhe Maloku nga distanca, por goditja e tij është e pasaktë.

83’ Provon Erzeni nga distanca, por nuk arrin të rrezikojë portën e Dajsinanit. Në aksionin pasardhës provon edhe Kadriu, por nuk arrin që të kalojë portierin e Laçit.

80’ Pas 5 minutash rikthehet ndriçimi në “Niko Dovana”.

75’ Ikin dritat në “Niko Dovana”. Ndalet takimi.

70’ Aksion model i Erzenit. Amir futet në zonën, driblon disa kundërshtarë, godet, por gjuajtja e tij përfundon jashtë.

69’ Laçi mundohet të reagojë me Babatunde, por gjuajtja e sulmuesit është shumë e lehtë për Xhikën.

68’ Minuta të mira për Erzenin, që ka rritur dominimin në fushën e lojës dhe i është afruar golit në më shumë se një rast. Laçi nuk po arrin dot të reagojë dhe nuk po rrezikon dot në portën e Xhikës.

64’ Dajsinani i mohon golin Erzenit. Alan lëshon një predhë nga jashtë zone, por portieri i Laçit fluturon dhe grushton goditjen e kundërshtarit.

59’ Erzeni sulmon nga e djathta, por Iljazi nuk arrin që të pasojë siç duhet për shokët e tij. Në aksionin pasardhës shijakasit janë të pafat sepse goditja e Kadriut përfundon në traversë.

57’ Goditje dënimi për Laçin në të djathtë të sulmit. Kroson Spahiu, topi kalon në zonë, por asnjë nga lojtarët miq nuk arrin që ta devijojë.

55’ Aksion model i Erzenit, por Nonato i vetëm përballë Dajsinanit nuk arrin që të mposhtë portierin e Laçit.

53’ Luftohet në mesin e fushës, por asnjëra nga skuadrat nuk arrin që të dominojë kundërshtarin. Mungojnë rastet për shënim në këto minuta të para të pjesës së dytë.

49’ Goditje dënimi për Laçin pranë zonës së Erzenit. Provon Mazrekaj, por gjuajtja e tij largohet nga mbrojtja shijakase.

46’ Nis pjesa e dytë në Durrës.

45+3’ Mbyllet pa gola një pjesë e parë e luftuar në Durrës. Erzeni mundohet të bëjë lojën, por rastin më të mirë e ka Laçit, që shënon me Spahiun, por goli i tij anulohet nga VAR.

39’ Mundësi e mirë për Erzenit, por lojtari shijakas nuk arrin që të dërgojë topin në rrjetë.

33’ Erzeni pretendon penallti. Por Meta ndëshkon Alan me karton të verdhë për simulim.

29’ Erzeni fiton një goditje dënimi në krahun e majtë të sulmit. Topi krosohet në zonë po Ademi nuk arrin që ta devijojë drejt portës.

23’ Provon nga distanca Borisiuk por gjuajtja e tij është shumë larg kuadratit.

20’ Kalojnë 20 minuta lojë nga sfida e “Niko Dovanës”. Protagonist në këto minuta ka qenë VAR, që anulon një gol të shënuar nga Laçi për pozicion jashtë loje.

17’ GOOOOOOOOOL Shënon Laçi me Spahiun. Goli verifikohet në VAR dhe anulohet për pozicion jashtë loje të Spahiut

16’ Erzeni pretendon penallti. Ademi pengohet në zonë, por për gjyqtarin Meta nuk ka 11-metërsh.

13’ Adeleke mundohet të përfitojë nga një gabim i Sadiki në mbrojtje dhe futet në zonë, por gjuajtja e tij devijohet në këndore.

8’ Aksion i gjatë i Erzenit, por Kadriu tregohet individualist dhe nuk rrezikon dot portën e Dajsinanit.

5’ Minuta më të mira për vendasit, që mundohen të spostohen në gjysmëfushën e Laçit.

1’ Nis sfida në “Niko Dovana”.

Në “Niko Dovana” përballen Erzeni dhe Laçi në sfidën që mbyll ndeshjet e ditës së sotme të "Abissnet Superiore" në "Oversport".

Pas suksesit përballë Partizanit, shijakasit kërkojnë një tjetër fitore, ndërsa miqtë nga Laçi kërkojnë të lënë pas krahëve këtë monent të vështirë, pasi kanë pësuar 3 humbje në 3 sfidat e fundit në kampionat.