E fundit!

20:36 Kosova & Bota

Mbyllja e procesit të votimit/ Kurti: Vullneti i qytetarëve është brenda kutive

Kryeministri në detyrë i Kosovës, Albin Kurti ka reaguar p...

Valduci godet përsëri

21 Prill 2025, 14:47, Sport CNA

Adriano Valduci ishte i ashpër pas humbjes së Shqipërisë U-16 ndaj moshatarëve të Andorrës.

Në një prononcim ekskluziv për CNA, ai nuk i kurseu kritikat ndaj presidentit të FSHF-së, Armand Dukës, duke thënë se ka tharë fidanët.

Ndër të tjera ai kishte edhe një paralajmërim të fortë për kreun e futbollit shqiptar.

Z. Valduci, si e shikoni situatën e Kombëtares U-16 pas humbjes me Andorrën?

Prej shumë kohësh e kam falur Armand Dukën, por erdhi momenti që unë të flas. Humbja e Shqipërisë U-16 ndaj Andorrës është e papranueshme për të gjithë, sepse Duka ka tharë fidanët. U-16 janë filizat dhe fidanët e së ardhmes. Duka nuk ka qenë i vëmendshëm. Ka tharë të gjithë pemëtoren që kishim ndërtuar me këta fidanë të rinj, sepse na rrahu Andorra. E kam paralajmëruar Dukën. E bëra edhe me Anglinë, që duhej të luanim me skemën 3-4-4.
Tani luan U-16 me Andorrën dhe nuk luan me të njëjtën skemë. Unë ia jap skemën dhe ai nuk i përdor. Fat i madh që kemi trajnerin Silvinjo i cili i dëgjon kritikat e mia dhe i përdor skemat, ndërsa Duka nuk vë mend.

Cila është përgjegjësia e Armand Dukës?

Përgjegjësia e Armand Dukës është shumë e madhe. Na ka tharë fidanët. Kaq mund të them për momentin. Ky është paralajmërimi i fundit për të. T’i vendosë gishtin kokës, sepse ka për ta gjetur belaja.

Mos po na gënjen me fitoret e femrave, duke lënë meshkujt?

Unë i kuptoj skemat e Dukës. Ai që të justifikojmë humbjen U-16 ndaj Andorrës, do ta na i shesë si fitore të madhe atë të femrave ndaj Kroacisë. Po bëhet edhe Duka si Sorosi, që duke u marrë shumë me gratë, harroi burrat.

Cili është rekomandimi juaj i fundit për Dukën?

Rekomandimi im është i drejtpërdrejtë. T’i vendosë gishtin kokës. Ta mendojë sikur i ze salmonela zogjte e pulave. Në të kundërt, unë do të mbledh të gjithë presidentët dhe biznesmenët dhe do të shpall kandidaturën time përballë Dukës, për ta rrëzuar nga karrigia e tij nga Federata. I ka pasur skemat dhe nuk i ka aplikuar, duke na shkatërruar filizat. Kjo është e pafalshme.