"Çmenduri" në Angli, shtatë ekipe luftojnë për Champions

19 Prill 2025, 21:06, Sport CNA

"Çmenduri" në Angli, shtatë ekipe luftojnë

Me afrimin e fundit të sezonit, Premier League po përjeton një nga betejat më të forta të viteve të fundit për një vend në Ligën e Kampionëve. Fitorja e Aston Villas ndaj Newcastle me rezultatin 4-1 ka trazuar edhe më tepër ujërat e klasifikimit, duke krijuar një situatë tejet të komplikuar, ku plot pesë ekipe luftojnë për vetëm tre vende të mbetura në elitën e futbollit evropian për sezonin e ardhshëm.

Sezonin e ardhshëm, falë renditjes së Anglisë në koeficientët e UEFA-s, Premier League do të ketë pesë përfaqësues në Champions. Liverpool dhe Arsenali, me ecurinë e tyre konstante dhe diferencën e pikëve, duken të sigurt drejt kualifikimit, duke lënë një luftë të zjarrtë për tre vendet e tjera. Newcastle mban aktualisht vendin e tretë me 59 pikë, por ndiqet nga Manchester City me 58 pikë, Nottingham dhe Aston Villa me nga 57 pikë, ndërsa Chelsea renditet i shtati me 54 pikë, por me një ndeshje më pak të zhvilluar.

Aston Villa konfirmoi momentin e mirë, pavarësisht eliminimit nga Champions pak ditë më parë dhe në kampionat shkatërroi një rival direkt si Newcasle. Skuadra e Unai Emeri do të luftojë fortë për të kapur një nga pesë vendet e para për në Ligën e Kampioneve.

Ndërkohë, në ndeshjet e tjera të javës së 32-të, Manchester City arriti një fitore të rëndësishme në transfertë ndaj Everton me rezultatin 2-0. Sulmuesi i kombëtares shqiptare, Armando Broja, luajti si titullar nga minuta e parë për Evertonin, duke qenë në fushë për 64 minuta. Ishte një mundësi e mirë për të treguar vlerat e tij ndaj një prej ekipeve më të forta në botë, megjithëse nuk arriti të gjente rrjetën.

Golat për “Qytetarët” u shënuan në fundin e ndeshjes. Fillimisht O’Reilly zhbllokoi rezultatin në minutën e 84-t, ndërsa Kovaçiç vulosi fitoren me një gol në minutën e 92-të. Me këtë triumf, City ngjitet në vendin e katërt me 58 pikë dhe vazhdon garën për të kapur Champions-in.

Everton, në anën tjetër, renditet në vendin e 13-të me 38 pikë dhe i duhet të ruajë qetësinë në javët e mbetura për të shmangur surprizat në fundin e tabelës.

Në sfidat e tjera të javës, Brentford zhvilloi një ndeshje spektakolare ndaj Brajtonit, duke fituar me rezultatin 4-2.