web counter
LEXO PA REKLAMA!

SHKARKO APP

App Store
Google Play

Totenhemi zgjedh trajnerin e ri, i "rrëmben" objektivin Liverpulit

23 Maj 2023, 14:25, Sport CNA

Ky sezon mund të konsiderohet pa frikë si i dështuar për Totenhemit. "Spurs"-at e nisën me pretendime madhore me teknikun Antonio Konte në krye, por shpejt entuziazmi u “shua” dhe skuadra me kalimin e ndeshjeve doli nga të gjithë objektivat sezonalë duke detyruar drejtuesit e londinezëve të shkarkonin italianin. Por, asgjë nuk ndryshoi dhe zëvendësuesi i Kontes, Kristian Stellini përfundoi gjithashtu i shkarkuar me skuadrën që tashmë ka kaluar në duart e Ryan Mason.

Në këtë formë, te Totenhemi po punojnë për “timonierin” e sezonit të ardhshëm, teksa i preferuari është Arne Slot. Holandezi është aktualisht në krye të Fejnordit madje me këta të fundit sapo u shpall kampion i Eredivisie dhe për këtë arsye drejtuesit holandezë nuk e lënë të largohet pasi kërkojnë me ngulm të vijojnë projektin me 44-vjeçarin.

Gjithsesi, Totenhemi po këmbëngul dhe në këtë drejtim po punon edhe agjentja e Slot, Rafaela Pimenta, e cila kërkon të negociojë mes dy klubeve. Në fakt, Slot ka një klauzolë lirimi prej 5 milionë paundësh nga Fejnordi, por që aktivizohet vetëm verën e ardhshme.

Ndaj, për ta liruar nga detyrimet me holandezët, Totenhemi duhet të paguajë diçka më shumë se dyfishin dhe mund t’ia dalë me ndërmjetësimin e Pimentës. Nëse Slot merr drejtimin e Totenhemit, atëherë anglezët do të kalonin në klubet favorite për të nënshkruar edhe me talentin e Fejnordit, Orcun Kokcu, i cili është një objektiv i madh i Liverpulit në merkaton verore, teksa kartoni i tij kushton të paktën 40 milionë paund.





Lajmet e fundit nga