E fundit!

21:34 Aktualitet

Protestat në Tiranë/ Eksperti i sigurisë: Prapavijë e huaj që e shfrytëzon dhe shumicë radikale në rrjete

Eksperti i sigurisë, Ervin Karamuço, ngriti sot dy shqetës...

Makineria e Man.City, kush mund ta ndalojë ekipin e Pep Guardiolës?

23 Maj 2023, 09:42, Sport CNA

Manchester City është bërë skuadra e parë në Premier League që e fiton titullin tri herë radhazi, që nga koha kur rivalët qytetas të Manchester United arrinin diçka të tillë në sezonet 2006/07, 2007/08, 2008/09.

Mënyra se si "Citizens" ia dolën këtë sezon është vërtetë e jashtëzakonshme, pasi rekuperuan 8 pikë për të parakaluar Arsenalin dhe për të festuar titullin të dielën në ”Etihad Stadium” pasi mundën 1-0 Chelsea-n.

Falë gjenialitetit të Guardiolës, Manchester City ka vendosur standarde shumë të larta dhe një dinasti që do të vijë vetëm duke u konsoliduar. Nga shumë opinionistë në futbollin anglez, skuadra që Guardiola ka në dispozicion te City këtë sezon konsiderohet më e mira, që kur tekniku u emërua në vitin 2016. Nuk kontestohet në asnjë mënyrë organika që Pep ka pasur në sezonet e shkuara, pasi edhe në sezonin 2018/19 apo në sezonin 2020/21, Guardiola krijoi një makineri të frikshme, por kontigjenti i këtij sezoni, i shoqëruar me harmoninë, përvojën dhe urinë që kanë të gjithë lojtarët së bashku është e pabesueshme.

Por, ekipi i edicionit 2022/23 qëndron përballë dy provave finale, ku nëse i kalon me sukses, meriton të quhet jo vetëm skuadra më e kompletuar e Guardiolës që nga koha kur ky i fundit mori drejtimin në ”Etihad”, por edhe një nga skuadrat më të mira në historinë e futbollit anglez, krahas Man.United që fitoi tripletën në edicionin 1998/99, Arsenalit që fitoi Premier League pa asnjë humbje në edicionin 2003/04 apo dhe Chelsea-t që fitoi kampionatin nën drejtimin e Mourinho-s në edicionin 2004/05, duke pësuar vetëm 15 gola përgjatë gjithë sezonit.

Manchester City është vetëm dy ndeshje larg përjetësimit në librat e artë të futbollit, ku i duhet të fitojë finalen e FA Cup përballë Man.Utd dhe finalen e Champions League përballë Interit, për të konsoliduar statusin e saj madhështor jo vetëm në ishull, por edhe në Europë.

Në sezonin e ardhshëm, Manchester City do të mbetet përsëri skuadra për t’u mundur, pavarësisht ambicieve të Arsenal, Liverpool, Manchester United, Newcastle apo dhe Chelsea që mund të ringrihet me Mauricio Pochetino-n. Erling Haaland ka rezultuar si një revolucion total në sulmin e Man.City, me repartin ofensiv që u kthye nga një pikë e dobët në kohën e Gabriel Jesus, në armën më të fortë me sulmuesin norvegjez që tashmë po thyen rekord pas rekordi e po udhëheq përpara ekipin. Qofshin milionat, transferimet e bujshme apo ndryshimi i trajnerëve, në Angli ende nuk e kanë zgjidhur ekuacionin se si mund të ndalin makinerinë rrafshuese të Pep Guardiolës.