E fundit!

19:20 Aktualitet

Protesta e 29-të kundër qeverisë/ Qytetarët mblidhen në shesh

Këtë të diel po mbahet në Tiranë protesta qytetare e 29-të...

Shtatori i emocioneve kuqezi, në fushë do të zbresin Kombëtarja A dhe moshat

1 Shtator 2024, 17:05, Sport CNA

Shtatori i emocioneve kuqezi, në fushë do të zbresin

Shtatori është muaji i emocioneve të mëdha, pasi në fushë do të zbresin sërish kuqezinjtë. Ky muaj do të jetë tejet impenjativ për ekipet Kombëtare, teksa në kalendar janë 9 ndeshje, disa zyrtare e të tjera miqësore.

Pas një sezoni të mbushur me emocione të mëdha që kulmoi me pjesëmarrjen e Shqipërisë në finalet e Europianit “Gjermani 2024”, Kombëtarja është gati për rrugëtimin e ri në Ligën e Kombeve. Skuadra e drejtuar nga trajneri Silvinjo do të luajë ndeshjen e parë në grupin B1 më 7 shtator në transfertë ndaj Ukrainës, në stadiumin “Epet Arena” në Çeki. Tre ditë më pas, më 10 shtator, kuqezinjtë do të presin Gjeorgjinë në stadiumin “Air Albania”, në orën 20:45. Dy ndeshje shumë të rëndësishme për Shqipërinë, që synon maksimumin në Ligën e Kampioneve.

Më 6 shtator në fushë do të zbresë edhe Shqipëria U-21. Skuadra e drejtuar nga trajneri Alban Bushi, do të luajë në transfertë ndaj Zvicrës U-21, sfidë e vlefshme për kualifikueset e “Euro 2025”. Ky takim do të zhvillohet në stadiumin “Stade de la Tuliere”, në orën 19:30.

Shqipëria U-19 ka në program dy ndeshje miqësore ndaj Turqisë U-19 në datat 6 dhe 8 shtator. Kuqezinjtë e drejtuar nga trajneri Julian Ahmataj do të masin forcat përballë bashkëmoshatarëve të përfaqësueses së Turqisë për të testuar dhe kolauduar skuadrën me fokus eliminatoret e muajit nëntor ku do të përballen me Izraelin, Danimarkën dhe Irlandën e Veriut. Të dy takimet miqësore do të zhvillohen në Turqi. Ndeshja e parë e kuqezinjve është programuar të luhet më 6 shtator në orën 16:00, ndërsa takimi i dytë është planifikuar të luhet dy ditë më vonë, më 8 shtator po në orën 16:00.

Edhe Shqipëria U-17 ka në program dy ndeshje miqësore ndaj Luksemburgut në datat 4 dhe 6 shtator. Kjo do të jetë edhe prova e parë për trajnerin e ri të përfaqësueses U-17, Andrea Tedesko përpara kualifikueseve të Kampionatit Europian “Shqipëri 2025” që do të luhen në muajin tetor në vendin tonë, ku kuqezinjtë janë pozicionuar në grupin 3 së bashku me Holandën, Kroacinë dhe Ishujt Faroe. Ndeshja e parë miqësore është programuar të luhet më 4 shtator në stadiumin e Vorës, në orën 16:30, ndërsa miqësorja e dytë Shqipëri – Luksemburg, do të luhet në “Shtëpinë e Futbollit” më 6 shtator në orën 10:00.

Dy ndeshje miqësore në program ka edhe Kombëtarja U-15, që në datat 24 dhe 26 shtator do të përballet me Malin e Zi. Ndeshja e parë do të luhet në Podgoricë, ndërsa takimi i dytë në Shkodër në stadiumin “Reshit Rusi”. Teste mjaft të vlefshme për skuadrën që drejtohet nga trajneri Armand Dama për të testuar e vëzhguar lojtarë të rinj.

Gjithashtu, në fundin e muajit shtator do të startojë turneu “UEFA Development” U-15 për vajza, që organizohet nga FSHF në bashkëpunim me UEFA-n. Në këtë turne veç ekipit tonë Kombëtar do të marrin pjesë edhe Kosova, Estonia dhe Maqedonia e Veriut. Të gjitha ndeshjet janë planifikuar të luhen në datat 30 shtator, 2 tetor dhe 5 tetor.

Edhe ekipet U-13, U-14 dhe U-16, do të zhvillojnë grumbullime ditore dhe stërvitje në “Shtëpinë e Futbollit”. Në fushë do të zbresin gjithashtu edhe ekipet U-15, U-17 dhe U-19 për vajza, që do të zhvillojnë seanca stërvitore ditore nën drejtimin e trajnereve kuqezi. Gjithçka bëhet për të vëzhguar nga afër formën e futbollisteve dhe për t’u përgatitur sa më mirë për kompeticionet europiane për këto grupmosha.