E fundit!

09:42 Aktualitet

“Jam i kërcënuar me jetë, si unë dhe familja ime”/ Flet ish i dënuari, akuza oficerit të policisë gjyqësore

Besmir Gjezari sot ka përfituar lirinë falë projektligjit ...

Shqiptari i parë që luajti me Zvicrën: Shqiponjën do ta bëja edhe unë

22 Shkurt 2023, 09:52, Sport CNA

Futbollistët shqiptarë te kombëtarja e Zvicrës përbëjnë një histori të gjatë. I pari shqiptar që ka luajtur me kombëtaren helvete ka qenë Milaim Rama. Veç organikës së Zvicrës në vitet e fundit, me emra si Mehmedi, Granit Xhaka, Shaqiri, Xhemaili apo edhe Behrami, ka qenë Rama ai që veshi fanellën e helvetëve për shtatë herë.

Ish-futbollisti lindi në Kosovë, por karrierën e tij e zhvilloi në Zvicër ku u aktivizua me klube si Thun e Schaffhausen, ndërsa pati edhe një eksperiencë në Gjermani me Augsburgun. Së fundmi, në një rrëfim të gjatë për median zvicerane "Blick.ch", 46-vjeçari theksoi se edhe ai do të festonte me simbolin e shqiponjës ashtu siç kanë bërë më parë Xhaka e Shaqiri, ndërsa tregoi edhe të gjithë rrugëtimin e tij drejt elitës së futbollit zviceran.

“Kur vjen puna te gjunjët unë ndihem shumë i plakur, edhe pse aktualisht jam 46 vjeç. Por, duke qenë se kam lindur më datë 29 shkurt, kam mundur ta festoj datëlindjen vetëm 11 herë”.

Cilat ishin ëndrrat e Ramës si fëmijë?

- Në fëmijëri time mendoja se gjithë jetën time do ta kaloja në vendlindje. Nuk e mendoja se një ditë do të bëhesha një qytetar zviceran dhe një futbolllist profesionist. Jam rritur në një vend të quajtur Viti dhe që kishte rreth 100 shtëpi. I gjithë fisi im jetonte aty dhe kur kthehesha nga shkolla luaja futboll, ose ndihmoja mamanë time në lidhje me kullotat.

A kishte aty një fushë futbolli?

- Po ishte një e vogël në kodrinë sipër qytezës. Por, ishte shumë e vogël, nuk ishte e balancuar dhe ishte me baltë. Ndonjëherë mungonin edhe portat.

Në moshën trevjeçare, babai juaj Shaqiri, nisi të punonte në Zvicër, sa ju mungonte prania e tij?

- Kështu bënin të gjithë në atë kohë, kishte shumë pak mundësi punësimi në vendlindje. Dhe, kjo është arsyeja pse shumë kryefamiljarë shkuan në Gjermani apo Zvicër. Unë dhe tre binjakët ishim shumë të mërzitur me largimin e babait dhe mamaja jonë, Zejnepja, mbulonte edhe rolin e tij. Jam shumë krenar me mënyrën se si ajo e ka përballuar atë kohë.

A kishit një idhull në futboll kur ishit i ri?

- Po, Marco Van Basten i Milanit dhe Fadil Vokrri i Prishtinës. Në atë kohë, Prishtina luante në një kampionat të fortë në Jugosllavi dhe për ne fëmijët ishte një kënaqësi ta admironim Vokrrin kur shkonim në stadium.

Në vitin 2012 përfundoi edhe karriera me Thun…

- Pata një diskutim me trajnerin Bernard Challandes dhe ai më çoi në tribunë për disa kohë. Asgjë nuk funksionoi dhe e mbylla.

Ishit lojtari i parë shqiptar te kombëtarja e Zvicrës…

- Është një nga gjërat më të bukura në karrierën time, vesha fanellën e Zvicrës në shtatë ndeshje. Shumë e ëndërrojnë, por unë ia arrita.

Ishit i pari shqiptar në Europian, ishte viti 2004…

- E gjithë Kosova ishte krenare për mua, ishte si një përrallë. Luajta disa minuta në Europian dhe kjo tashmë është në librat e historisë. E pabesueshme.

Në vitin 2018, patriotët tuaj, Shaqiri dhe Xhaka, shkaktuan debat me festën e tyre me shqiponjë…

- Jo, ishte thjesht një gjest, asgjë më shumë. Edhe unë do të festoja me shqiponjë, nuk ka asnjë problem.