web counter
LEXO PA REKLAMA!

SHKARKO APP

App Store
Google Play

E fundit!

x

Portugalia bind, Ronaldo shënon dopietë historike

12 Qershor 2024, 12:21, Sport CNA

Portugalia bind, Ronaldo shënon dopietë historike

Portugalia dhe sulmuesi kryesor, Cristiano Ronaldo, duken në formë të shkëlqyer para Europianit që do të mbahet në Gjermani.

Luzitanët triumfuan pastër me rezultatin 3-0 në miqësoren ndaj Irlandës në shtëpi. Padyshim më i miri në këtë përballje, ishte Ronaldo, që realizoi dopietë.

Falë këtij dygolëshi, 39-vjeçari bëhet lojtari i parë në histori, që shënon për 21 vite radhazi për kombëtaren e tij. Më parë, askush nuk e ka regjistruar këtë statistikë. Ronaldo ka shënuar çdo vit me Portugalinë, nga viti 2004.

Pas ndeshjes, sulmuesi veteran, u shfaq shumë i lumtur. “Nuk më kanë mbetur shumë vite në futboll. Kështu që, më duhet ta shijoj këtë moment. Jam i dashuruar me futbollin. Çdo ndeshje është speciale. Jam në "Euro 2024" me Portugalinë, ndihem krenar për këtë… Është një ëndërr, njëjtë si kur isha 20 vjeç”, tha Ronaldo. 

Sa i përket miqësores me Irlandën, pjesa e parë u mbyll me avantazhin minimal të portugezëve, falë golit të shënuar nga Joao Felix. Sulmuesi, shfrytëzoi në maksimum një asist të marrë nga Bruno Fernandes, për të zhbllokuar sfidën në minutën e 18-të.

Fraksioni i dytë nisi me Portugalinë në sulm dhe Ronaldo dyfishoi shifrat në minutën e 50-të. Sulmuesi vulosi takimin, në minutën e 60-të, duke shënuar për 3-0.

Dominim absolut i luzitanëve, që nuk e vunë fitoren për asnjë moment në dyshim. Skuadra e Roberto Martinez, u rikthye te triumfi, pak ditë pas humbjes me Kroacinë.

Në Europian, Portugalia është pjesë e një grupi jo shumë të vështirë, me kombëtare si Çekia, Turqia dhe Gjeorgjia.

Me lojtarët që ka në përbërje, kombëtarja portugeze, shihet si një nga favoritët për të fituar "Euro 2024".





Lajmet e fundit nga