web counter
LEXO PA REKLAMA!

SHKARKO APP

App Store
Google Play

Pesë lojtarë gjejnë golin, si u paraqitën legjionarët

24 Nëntor 2025, 14:04, Sport CNA

Pesë lojtarë gjejnë golin, si u paraqitën legjionarët

Futbollistët e Kombëtares shqiptare vazhdojnë të shkëlqejnë në arenën ndërkombëtare, teksa gjatë javës që lamë pas disa prej tyre ishin protagonistë me gola dhe asiste vendimtare në klubet e tyre.

Arbër Hoxha është futbollisti i momentit në Kroaci. Pasi u shpall lojtari më i mirë i muajit shtator, sulmuesi i Kombëtares fitoi të njëjtin çmim edhe për muajin tetor dhe e festoi duke shënuar dy gola në ndeshjen e fundit të kampionatit ndaj Varazdin. Dinamo Zagreb triumfoi 3-1, ndërsa Hoxha realizoi në minutën e 37-të të pjesës së parë dhe në minutën e 53-të të pjesës së dytë.

Dy gola shënoi edhe Jasir Asani për Esteghlal në Kupën e Iranit, duke i dhënë fitoren skuadrës së tij në kohën shtesë. Fillimisht sulmuesi kuqezi barazoi rezultatin në fundin e kohës së rregullt me një penallti, ndërsa në shtesë vulosi fitoren e ekipit.

Qazim Laçi realizoi një eurogol nga goditja e dënimit me Rizespor ndaj Fenerbahce-s në kampionatin turk. Mesfushori kuqezi shënoi golin e dytë të takimit në minutën e 15-të, duke mposhtur portierin kundërshtar, Ederson.

Rrugën e rrjetës e gjeti edhe Juljan Shehu, i cili realizoi për Widzew Lodz në kampionatin polak në sfidën ndaj Korona Kielce. Shehu shënoi në minutën e 49-të, megjithatë ekipi i tij u mund në këtë takim.

Te goli u rikthye edhe sulmuesi i Kombëtares, Mirlind Daku, i cili realizoi golin e vetëm në ndeshjen Rubin Kazan – Akhmat Grozny, duke i dhënë fitoren skuadrës së tij. Daku shënoi në minutën e 75-të dhe ky ishte goli i tij i nëntë në kampionat.

Anis Mehmeti dha tri asiste në fitoren 3-0 të Bristol City ndaj Swansea, duke qenë ndër më të mirët në fushë me një paraqitje shumë të mirë.

Titullarë këtë javë ishin gjithashtu Thomas Strakosha, Mario Mitaj, Berat Gjimshiti, Arlind Ajeti, Ylber Ramadani, Medon Berisha, Adrion Pajaziti dhe Rey Manaj.

Ndërkohë, si zëvendësues dhanë kontributin e tyre Nedim Bajrami, Armando Broja dhe Indrit Tuci.





Lajmet e fundit nga