Partizani “i plagosur”, të kuqve u dëmtohen edhe dy titullarë

17 Shkurt 2023, 14:29, Sport CNA

Dëmtimet dhe Partizani në këtë sezon duket se janë dy paralele të njëra-tjetrës. Në javët e fundit u mendua se te të kuqtë mbaroi maratona e lojtarëve me probleme fizike dhe thuajse të gjithë po riktheheshin në formën e duhur fizike, por gjërat ndryshuan vetëm disa ditë më parë, kur u njoftua dëmtimi i Eljon Sotës dhe Alban Hoxhës. Këta dy lojtarë nuk janë të vetmit në infermieri, pasi edhe dy dëmtime të tjera i janë shtuar listës gjatë kësaj jave.

Mësohet se edhe Paulo Buxhelaj ka pësuar një dëmtim dhe pritet të mungojë në ndeshjen e radhës ndaj Erzenit, të shtunën në orën 19:00 në stadiumin “Partizani”.

Mbrojtësi i majtë nuk është stërvitur në dy ditët e fundit dhe koha për rikuperimin e tij nuk premton aspak. Kështu, Buxhelaj pritet të jetë mbrojtësi i dytë, që i bashkohet listës së mungesave, pas Sotës.

Probleme ka edhe në mesfushë, aty ku Valentino Murataj ka shfaqur shqetësime fizike dhe ditën e djeshme nuk është stërvitur me skuadrën, por është angazhuar vetëm me ushtrime në palestër.

Ndryshe nga Buxhelaj, situata e tij është disi më optimiste, por mbetet për t’u parë nëse do të arrijë të jetë gati për Erzenin.

Murataj është një nga lojtarët më stabël në formacionin e Kolelës dhe alternativat në stol nuk janë të shumta. Mjekët e të kuqve do të përpiqen ta rikuperojnë në kohë për sfidën me Erzenin.

Sa për Hoxhën dhe Sotën, situata ka ndryshuar për gardianin. Sota nuk është stërvitur me skuadrën gjatë gjithë këtyre ditëve dhe është thuajse e sigurt se do të mungojë ndaj Erzenit, por Hoxha duket se ka arritur të rikuperohet shpejt dhe ka shanse që të jetë gati që në ndeshjen e së shtunës.

Përgjigjet e muskujve të 35-vjeçarit kanë qenë pozitive dhe kjo ka rritur optimizmin për rikuperimin e kapitenit.

Hoxha është ende një element shumë i rëndësishëm në difensivë, sidomos në situatën kur në këtë repart mungojnë lojtarët me eksperiencë dhe me ADN-në e liderit.