Partizani humb një tjetër titullar, 3 çështje për t'u zgjidhur te “demat”

20 Gusht 2023, 11:47, Sport CNA

Partizani humb një tjetër titullar, 3 çështje për

Mbrojtësi i majtë maqedonas, David Atanaskoski, do të jetë mungesa e sigurt e Partizanit në ndeshjen e parë të raundit “play off” ndaj Astanës, që do të luhet më 24 gusht në Kazakistan.

Titullari i të kuqve u bë çështje edhe para takimit me Valmierën, pasi mendohej se kishte plotësuar numrin e kartonëve (3), por rregullorja e UEFA-s ia lejonte aktivizimin, duke qenë se ishte ndëshkuar në kompeticione të ndryshme dhe të verdhët nuk mbarteshin. Mirëpo, me kartonin që mori në takimin e së enjtes në Elbasan, maqedonasi plotësoi numri tre në Ligën e Konferencës dhe do të jetë i pezulluar për këtë takim. Tashmë trajneri Zekiç ka në dispozicion për këtë rol dy lojtarë që mund ta zëvendësojnë Atanaskoskin: Paulo Buxhelaj dhe Leart Zekolli.

Për shkak dëmtimi munguan në ndeshjen e kthimit ndaj Valmierës sulmuesit Kristian Mba dhe Alfred Mensah, si dhe mbrojtësi Saliu Sembene. Gjithashtu nuk ishte i grumbulluar fantazisti brazilian, Viktor da Silva, për të cilin është marrë një masë nga trajneri Zekiç për thyerje të disiplinës. Tashmë, në prag të takimit me Astanën, kur duhen edhe gjashtë ditë, në kampin e kuq kanë tri çështje për të zgjidhur.

Së pari, stafi do të shikojë gjendjen e Kristian Mbasë, i cili ka nisur prej ditësh riaftësimin nga dëmtimi që pësoi në Letoni. Nigeriani ka probleme në muskujt e barkut, ndërsa ka thënë për “Panorama Sport” se do të jetë gati javën e ardhshme. Gjithçka mbetet për t’u parë në vazhdimësi. Së dyti, pritet në vijim të sqarohet edhe çështja “Da Silva” dhe shanset për rikthimin në skuadër të brazilianit, i cili është golashënuesi më i mirë i skuadrës në sezonin e titullit.

Së treti, klubi me shumë mundësi do të federojë për “play off” edhe afrimin më të ri, mbrojtësin e ardhur nga Kukësi, Altin Bytyçi. Ky i fundit ende nuk është prezantuar nga klubi, por sipas të gjitha gjasave, të dielën do të kryejë stërvitjen e parë me të kuqtë. Në këtë moment, Bytyçi bëhet alternativë e mirë për mbrojtjen, që ka shfaqur probleme jo të vogla në ndeshjet e fundit.